اسلام آباد۔ 15 اکتوبر (اے پی پی) قومی اسمبلی ءِ وزارت خزانہ نا کنڈآن پاننگانے کہ تدوک آ مسہ سال اٹی بنجائی حکومت نا کنڈآن مسکوہی فاٹا نا شونداری کن 270 ارب روپئی جاری کننگانے، 10 می این ایف سی نا بناداسکان متنے، این ایف سی آئین نا رداٹ اسہ وتواجہ ءُ ادارہ اسے۔ حکومت نا اونا فیصلہ ءُ ہچ ءُ عمل و دخل اس اف ولے حکومت نا است خواہی ءِ کہ فاٹا نا الس ءِ شونداری فنڈ آتیان اوفتا بشخ ملے وخت اس کہ اسپیکر چکاری نوٹس ءِ تعلقدار قائمہ کمیٹی نا حوالہ کرے۔ جمعہ نادے آ قومی اسمبلی نا دیوان اٹی ڈاکٹر حیدر علی نا مسکوہی فاٹا کن خیبرپختونخوا ءِ این ایف سی ایوارڈ آن ودکی 3 درسد بشخ جتا کپننگ نا بابت چکاری نوٹس نا ورندی ءِ ترساپارلیمانی سیکرٹری خزانہ زین قریشی پارے کہ این ایف سی آئینی ءُ ادارہ اسے ہراتینا فیصلہ غاتے تینٹ کیک۔ فیصلہ سازی ٹی حکومت نا ہچ ءُ کڑد اس اف۔ کابینہ فیصلہ کریسس کہ این ایف سی دا بابت آن فیصلہ کے۔ کابینہ دا فیصلہ کریسس کہ ہراتم اسکان این ایف سی اونا فیصلہ ءِ کپک ہمووخت اسکان بنجائی حکومت تینٹ فنڈنگ کیک۔ بنجائی حکومت داسہ مسہ سال اٹی 270 ارب روپئی خڑچ کرینے۔ چکاری نوٹس آ ڈاکٹر حیدر علی، ساجد خان وجنید اکبر نا سوج آتا ورندی ٹی پارلیمانی سیکرٹری زین قریشی پارے کہ 2019-20اٹی 129.7ارب روپئی جتا کننگا ہرافتیان 51 ارب آن زیات نا زر ریلیز ہم مسنے۔ اسہ پین سوج اسے نا ورندی ٹی زین قریشی پارے کہ دہ می این ایف سی ایوارڈ نا فیصلہ ہراتم مریک غٹ صوبہ غاک اوٹی فاٹاکن تینا بشخ ءِ شاغر۔ اصولی وڑاٹ داطے کننگانے کہ صوبہ غاک اوٹی بشخ شاغرہ۔ نن خوانہ کہ مسکوہی فاٹا نا الس ءِ شونداری کاریم تیٹی اوفتا بشخ ملے۔ جنید اکبر خان خواست کرے کہ داچکاری نوٹسءِ کمیٹی نا حوالہ کننگے۔ اونا پاننگ ئس کہ فاٹا نا آبادی ءِ مون آ تخسا بنجا و صوبہ غاک تینا قول آتے پورو کتوس۔ حاجی اقبال پارے کہ بنجائی حکومت و صوبائی حکومت ہراوڑ فاٹا نا الس نا خیال ءِ تخار مستین اٹ کس اس تختنے۔ ننا بٹوارہ بنجاغان مسنے ہنداخاطرآن نن صوبہ غاتیان آخا بنجاغان فنڈ خواہنہ۔
