اسلام آباد۔ 15 اکتوبر (اے پی پی) بنجائی وزیر نیشنل فوڈ سیکورٹی اینڈ ریسرچ سید فخرامام پارینے کہ ملکی شونداری و شونہالی کن کشت وکشار اٹی پٹ وپول ءِ مون آ دننگ نا گرج ءِ، کشاری بشخ اٹی پوسکن آٹیکنالوجی نا کاریم اٹ اتنگ ءِ ودفنگ اولیت ءِ۔ داخیال آتا درشانی ءِ او جمعہ نادے آاین اے آرسی ٹی جہانی یوم خور انا رداٹ اڈ ہلوک آ دود آن تران کرساکرے اوپارے کہ میکانایزیشن آن بیدس نن جاپان و چین آنبار شون ہلنگ کپنہ، ننے او ملک آتا آزموندہ غاتیان فائدہ ہرفسا مون آ ہنوئی مریک۔ اوپارے کہ سرسہبی دوئی کننگ کن پدریسہ خواری نا گرج مریک، ننے کشاری بشخ ءِ پدریسہ پوسکن آ خواست آتون ہم گرنچ کروئی مریک۔ اوپارے کہ کاروباری تپہ زالبول ءِ نوکری ترسا شمولیت ءِ ودفے تانکہ اوفتا لائخی تے ملک وقوم انا شونداری کن کاریم اٹ اتنگ مرے۔ اوپارے کہ کشاری بشخ اٹی پوسکن آ ٹیکنالوجی نا مون آ دننگ وخت انا گرج ءِ۔ ننے ٹیکنالوجی ءِ دنیا نا ہرکونہ غان پاکستان آ بایدے اتین۔ اوپارے کہ پاکستان آئی ٹی تون اوار ایلو بشخ آتے ٹی مون آ ہِننگ ءِ ، ہیومن ریسورس ءِ جہانی لیول آ اتنگ نا گرج ءِ۔ اوپارے کہ راج اٹ دولت نا غیر منصفانہ بشخنگ آن تناؤنا کیفیت ودی مریک۔ اوپارے کہ حکومت غٹ بشخ آتا شونداری آ چکار کرینے، راج انا آسراتی کن کشاری پٹ وپول ءِ اولیت تننگ انگ ءِ۔ اوپارے کہ دولت نا پیدوار و بشخنگ نا ہمدردی نا بنداو آ نظام اس ٹہیفنگ نا گرج ءِ۔ اوپارے کہ پاکستان اٹی بنداوی صنعت ءِ مون آ بایدے دننگے ہراٹی ایگرواکانومی ءِ اولیت بنداو تیا شون تننگے۔
