اسلام آباد۔ 15 اکتوبر (اے پی پی) بنجائی وزیر حوالکاری و شینکاری چوہدری فواد حسین پارینے کہ برطانوی عدالت آک ریحام خان ءِ زلفی بخاری آ دروغ انا دوبہ غاتیا ہرجانہ و معافی خواہنگ نا پرمان کریر، ہنداوڑنا کانودی نظام پاکستان اٹ اتنگ نا کوشست ءِ آجوئی درشانی نا برخلاف پارسا میڈیا مالک آک مہم نا بناءِ کیرہ۔ جمعہ نادے آ تینا اسہ ٹویٹ اسے ٹی اوپارے کہ بہرحال ریحام نا دروغ تڑمننگ اسہ وار ولدا پک مس، اصل اٹ او دروغ انا عادتی ءِ۔ بنجائی وزیر حوالکاری تینا ٹویٹ اٹی ریحام خان نا دا ٹویٹ نا ہم حوالہ ءِ تس ہراٹی ریحام خان زلفی بخاری آ خلوک آ دوبہ غاتیا معافی نامہ اس شیئرکرے۔ تینا معافی نامہ ٹی ریحام خان پارے کہ ای 6 و 7 دسمبر 2019ء آ تینا یوٹیوب چینل، فیس بک پیج و تینا ٹویٹر اکاؤنٹ آ ذوالفقار عباس بخاری آ روز ویلٹ ہوٹل ءِ کم نہاد آ بہاکننگ نا بابت دوبہ غلک ہرا غلط و دروغ ئسر۔ ریحام خان تینا ٹویٹ اٹی 7 دسمبر 2019، 15 مارچ 2020، 17 مارچ 2020ء و 23 مارچ 2020ء آ زلفی بخاری آ خلوک آ دوبہ غاتیا ہم پارینے کہ دوبہ غاک غلط و دروغ ئسر۔ اوزلفی بخاری آ خلوک آ دوبہ غاتیا بے شڑت معافی خواہس و ہتک عزت و کانودی خڑچ آتا مد اٹ زرادا کننگ آ ہم امنا کرینے۔
