بیجنگ۔ 15 اکتوبر (اے پی پی) چین و بھوٹان سیمی امور نا بابت مفاہمت نا یات داشت آ دستخط کرینو۔ چینی ریڈیو نا رداٹ چین نا کمکار وزیر خارجہ ووجیانگ ہاؤ و بھوٹان نا وزیرخارجہ ڈینڈی ڈوگی ویڈیو لنک انا کمک اٹ مسہ ریسہ غاتیا تالان چین۔بھوٹان سیمی مذاکرات نا روڈ میپ نا تیاری ٹی ترندی اتنگ کن مفاہمت نا یات داشت آ دستخط کرینو۔ داوخت آ ووجیانگ ہاؤ پارے کہ چین و بھوٹان سنگت ہمسایہ ملک ءُ ہرااسہ ایلو تون مش و دریاتتون تفوک ءُ، و ہڑتوم آ ملک آتا الس نا نیام اٹ روایتی سنگتی نا اسہ مرغن ءُ تاریخ اسے۔ اوداپت انا درشانی ءِ کرے کہ ہندا یات داشت آن ہڑتوم آ ملک آتا نیام اٹ سیمی مذاکرات اٹی ترندی اتنگ و چین و بھوٹان نا نیام اٹ سفارتی تعلقداری نا عمل ءِ مون آ دننگ اٹ بامعنی کڑد ادا کننگ مریک۔ اوپارے کہ چین صدر شی جن پنگ نا سفارتی فکر ءِ مون آ تخسا مخلصانہ و شریداری آ مبنی خوشگوار ہمسائیگی کن بریبری و پرامن بقائے باہمی نا بنداو آ بھوٹان تون جوان ہمسایہ، سنگت و شریداری نا خواہندار ءِ۔
