اسلام آباد۔ 14 اکتوبر (اے پی پی) وزیراعظم عمران خان صوبہ و آزاد کشمیر نا حکومت ءِ پارت کرینے کہ او سرسوز و کشاری ڈغار تا کاریم اٹ اتنگ اٹ بدلی ءِ توننگ کن کانود جوڑ کننگ اٹ ترندی اتیر، کیڈسٹرل میپنگ وتجاوزات آتا چٹفنگ و لینڈریونیو ٹی ودکی کن اہمیت تخک، پوسکن آپاکستان ہاؤسنگ پروگرام نا رداٹ تعمیراتی سرجز آتا بنامننگ آن پد آن داتم اسکان روزگار نا دونیم لکھ وارخواہی ودی مسنے۔ وزیراعظم عمران خان نا کماشی ٹی پنچ شنبے نادے آ ہاؤسنگ، تعمیرات و شونداری آ قومی رابطہ کمیٹی نا دیوان اڈ ہلک ہراٹی ساڑی و پوسکن آ ڈٹ آتیا پیش رفت نا جاچ ءِ ہلنگا۔ دیوان ءِ سرویئر جنرل آف پاکستان میجر جنرل شاہد پرویز حوال تس ہراڑآ وزیراعظم تینا ریمارکس اٹی پارے کہ کیڈسٹرل میپنگ اسہ مستند لینڈریکارڈ ڈیٹابیس نا شونداری ٹی کمکار مریک۔ داڑآن ڈغار نا حدبندی ءِ پیدوار وڑاٹ چاہنگ و غیرکانودی تجاوزات آتا توننگ اٹ کمک رسینگک وخت اس کہ دا مستند ڈیٹابیس آن ڈغارتیان دوئی مروک آ کٹیاءِ ودفنگ اٹ ہم کڑد ادا کیک۔ وزیراعظم پارے کہ سرسوز علاقہ غاتے شاری ڈٹ آتیٹی ہراڑے بدل کننگ انگ ءِ ہموڑے ڈغار نا کاریم اٹ اتنگ نا بابت دا بدلی تے ہُننگ نا گرج ءِ۔ او غٹ صوبائی و آزاد کشمیر نا حکومت آتے پارت کرے کہ او ڈغارتا کاریم اٹ اتنگ اٹ بدلی ءِ توننگ کن کانود جوڑ کننگ اٹ ترندی اتیر۔ وزیراعظم پارے کہ چاگڑدی و غذائی رکھ اکن سرسوز علاقہ و کشاری ڈغارتا رکھ المی ءِ ولے قاعدہ وضابطہ نا رداٹ تعمیراتی ڈٹ آتا موکل مریک۔ نیشنل کوآرڈینیشن کمیٹی ءِ پاننگاکہ نقشہ جوڑ کننگ نا اولیکو ریسہ نا رداٹ پنجاب اٹی 90 درسد، خیبرپختونخواٹی 96 درسد و بلوچستان اٹی 50 درسد ڈیجیٹلائزیشن پورو مسنے۔ چیئرمین سی ڈی اے دیوان ءِ پارے کہ کیڈسٹرل میپنگ نا کمک اٹ سی ڈی اے تجاوزات کروک آتیا جرمانہ بیٹ کننگ نا بناءِ کرینے و داڑآن دوئی مروک آ زر غیرکانودی ہاؤسنگ سوسائٹی تا دھوکہ دہی نا شست مروک آ بندغ آتے معاوضہ نا وڑاٹ ادائیگی ٹی کاریم اٹ اتنگ انگ ءُ۔ دیوان اٹی بنجائی وزیر حوالکاری و شینکاری چوہدری فواد حسین، وزیر مملکت حوالکاری و شینکاری فرخ حبیب، وزیراعظم نا خصوصی کمکار ڈاکٹر شہبازگل، ملک امین اسلم ئسک بشخ ہلکر۔ پنجاب آن میاں محمود الرشید، باسک قومی اسمبلی آفتاب صدیقی، چیئرمین نیاپاکستان ہاؤسنگ اتھارٹی لیفٹیننٹ جنرل (ر) انور علی حیدر، چیئرمین ایف بی آر، سرویئر جنرل آف پاکستان ئسک بشخ ہلکر۔ گورنر اسٹیٹ بینک رضاباقر، پنجاب ، بلوچستان، سندھ، گلگت بلتستان و آزادجموں کشمیر نا چیف سیکرٹریز و خیبرپختونخوانا ایڈیشنل چیف سیکرٹری ویڈیو لنک انا کمک اٹ دیوان اٹی بشخ ہلکر۔ داکان مست وزیراعظم راوی اربن ڈویلپمنٹ پروجیکٹ و سینٹرل بزنس ڈسٹرکٹ لاہور آ پیش رفت نا جاچ دیوان نا ہم کماشی ءِ کرے۔ وزیراعظم تعلقدار کمامدار آتے داڈٹ آتے ٹی ترندی اتنگ نا پارت کرے انتئے کہ دا ڈٹ آک ملک اٹی براہ راست درملکی زرکاری ءِ اتنگ کن بے کچ اہم ءُ۔
