راولپنڈی۔ 14 اکتوبر (اے پی پی) بنجائی وزیر داخلہ شیخ رشید احمد ہولی فیملی ہسپتال راولپنڈی نا دورہ ءِ کرسا ڈینگی وارڈ انا معائنہ ءِ کرے و ہسپتال انتظامیہ ءِ پارت کرے، ڈینگی نا مرض آن بچنگ کن الس اٹی آگاہی مہم اس چلیفنگے۔ پنچ شنبے نادے آ ہولی فیملی ہسپتال راولپنڈی نا دورہ نا وخت آ وزیرداخلہ شیخ رشید احمد ءِ ڈینگی نا ناجوڑ آتا بابت حوال تننگا و ہولی فیملی ہسپتال نا کنڈآن کروک آ بست وبند آتا بابت معلومدار کننگا۔ راولپنڈی میڈیکل یونیورسٹی نا وائس چانسلر ڈاکٹر محمد عمر وزیرداخلہ ءِ ڈینگی مرض انا بابت حوال تس۔ وزیرداخلہ شیخ رشید احمد ہسپتال انتظامیہ ءِ ڈینگی نا ناجوڑ آتے گچین آسراتی فراوان کننگ نا پارت کرے۔ وزیرداخلہ شیخ رشید احمد داوخت آ استفسار کرے کہ کورونا کون آ موذی مرض انا مقابلہ ءِ کننگ کینہ تو ڈینگی نا انت اکن مون ءِ توننگ مفک۔ بنجائی وزیر پارے کہ ڈینگی مرض ودی کروک آ سوب آتے چٹفنگ نا گرج ءِ، ضلعی انتظامیہ و جان جوڑی نا ادارہ غاتون اواری اٹ لائحہ عمل اس ترتیب تننگے۔ راولپنڈی میڈیکل یونیورسٹی نا وائس چانسلر ڈاکٹر محمد عمر وزیرداخلہ ءِ پارے کہ ہولی فیملی ہسپتال اٹی ڈینگی نا 87 ناجوڑ داخل ءُ ہرافتے ٹی 7 چناہم اوار ءُ ہسپتال اٹی ڈینگی مرض انا درمان کن غٹ تر آسراتی ساڑی ءِ۔
