اسلام آباد۔ 14 اکتوبر (اے پی پی) چیئرمین سینیٹ محمد صادق سنجرانی پارینے کہ پاکستان کوریاتون واپار ءِ پین ودفنگ نا خواہندار ءِ، کوریا سی پیک ڈٹ و علاقائی رابطہ غاتے ودفنگ کن خصوصی اقتصادی زون تیٹی ہم زرکاری آن بایدے فائدہ ہرفے۔ داہیت ءِ او سویلی کوریانا سفیر تون گپ وتران کرساپارے ہرا پنچ شنبے نادے آ پارلیمنٹ ہاؤس اٹی اوڑتون اوڑدہی کرے۔ اوڑدہی ٹی تین پہ تینی است خواہی نا باندات تون اوار ہڑتوم آ کنڈآتا تعلقداری و علاقائی حالیت آتیا گپ وتران کننگا۔ چیئرمین سینیٹ صادق سنجرانی پارے کہ پاکستان نا مخلوق کوریا تون تعلقداری تے بھاز شرف نا نظراٹ ہرک، سویلی کوریا نا امن، جمہوریت و شونہالی نا کسر آ سفر ستاکڑزک۔ اوپارے کہ منہ دہائی تا چنکووخت اسے ٹی کورونا تینے تیکنیکی وڑاٹ شون ہلوک زرگزران اٹ بدل کرینے، پاکستان سویلی کوریا تون تینا کثیر الجہتی تعلقداری تے بھاز اہمیت ایتک ہراٹی تین پہ تینی کمکاری نا سیاسی، اقتصادی، سائنسی، دفاعی، دودوربیدگی و ایلو بشخ آک اوار ءُ۔ اوپارے کہ اوغانستان اٹی ساڑی آ بدل مروک آ حالیت آتے مون آ تخسا پاکستان 16000آن زیات درملکی شاری تے حفاظت اٹ وطن آ سرکرے۔ سویلی کوریا ناخواست آ پاکستان 392 کورین باتی تے بحفاظت کابل آن کشانے، ہڑتوم آ راہشونک قومی و جہانی کہول آ اسیجائی فائدہ غاتا بابت تین پہ تینی کمک و تین پہ تینی تفہیم ءِ پین ودفنگ آ زور شاغا۔ اوپارے کہ پاکستان کوریا تون تینا زرگزرانی تعلقداری تے بھاز اہمیت ایتک، تدوک آ اِراسال اٹ کورین کمپنیک پاکستان اٹ تینا ساڑی گری و مارکیٹ شیئر اٹی پدریسہ ودی کرینو، پاکستان و کوریا نا نیام اٹ 1.122 بلین امریکی ڈالر نا ساڑی آ تین پہ تینی واپار ہڑتوم آ ملک آتا لائخی آن بھاز کم ءِ۔ چیئرمین سینیٹ پارے کہ تین پہ تینی واپار ءِمون آ دننگ کن فعال گام گیج ہرفنگ نا گرج ءِ، واپار نا مون آ دننگ کن فری ٹریڈ ایگریمنٹ ہڑتوم آ ملک آتے کن فائدہ مند جوڑ مریک، 220 ملین آبادی آ تالان ملک پاکستان، اوغانستان و نیامی ایشیائی ملک آتون گنڈوک ءِ ہرانا سوب آن پاکستان مچ آ دنیا کن زرکاری نا لحاظ اٹ اہم ءُ ملک اسے۔ صادق سنجرانی ایگزیم بینک انا کنڈآن اسلام آباد اٹی 88.80 ملین ڈالر نا خڑچ آن انفارمیشن ٹیکنالوجی پارک انا تفنگ آ کاریم بناکننگ آ سویلی کوریانا کمکاری نا ستاءِ کرے۔ اوڑدہی ٹی سویلی کوریا نا کنڈآن پاکستان اٹی سام سنگ موبائل مینو فیکچرنگ یونٹ نا جوڑ کننگ نا بابت ہم گپ وتران کننگا۔ صادق سنجرانی پارے کہ پاکستان کوریا تون واپار ءِ پین ودفنگ نا خواہندار ءِ، کوریا سی پیک ڈٹ و علاقائی رابطہ غاتے ودفنگ کن خصوصی اقتصادی زون تیٹی ہم زرکاری آن فائدہ بایدے ہرفے۔ اوڑدہی ٹی ہڑتوم آ ملک آتا پارلیمان تے خڑک اتنگ و پارلیمانی کمکاری ءِ پین مون آ دننگ کن پارلیمانی فرینڈ شپ پڑک آتا نیام اٹ ڈل آتا ہن وبر نا گرج آ زور شاغنگا۔ چیئرمین سینیٹ پارے کہ پاکستان ہڑتوم آ ملک آتا نیام اٹ دودوربیدگی کہول آہم ڈل آتا ہن وبر نا ستاءِ کیک، پاکستان اٹی گندھارا تہذیب نا رکھ و بحالی کن کوریانا کوشست ستاکڑزک۔ اوڑدہی ٹی ہڑتوم آ راہشونک تین پہ تینی تعلق ءِ پین سوگو کننگ آ امنا کریر۔
