اسلام آباد۔ 14 اکتوبر (اے پی پی) عشرت رحمت اللعالمین ؐ نا چرجوئی ٹی کل پاکستان مقابلہ نعت خوانی پنچ شنبے نادے آ ریڈیو پاکستان اسلام آباد اٹی اڈ ہلک۔ بنجائی وزیر مذہبی امور پیر نورالحق قادری و وزیر مملکت حوالکاری و شینکاری فرخ حبیب مہمان خاص ئسر۔ داوخت آ سیکرٹری حوالکاری و شینکاری شاہیرہ شاہد تون اوار وزارت حوالکاری و شینکاری و اونا ذیلی ادارہ غاتا بڑزکو آفیسر آک ہم ساڑی ئسر۔ مقابلہ ٹی مچ آ ملک آن 15 سال آن کم وئی مارو مسن تیان بیدس 15 آن 25 سال وئی نا مار و مسن تا نیام اٹ اِراکیٹیگری تیٹی بشخ ہلوک آ ثناء خوان مصطفیٰ بشخ ہلک۔ 15 سال آن کم وئی نا کیٹگری ٹی سندھ آن حسن علی شاہ و مسن تیٹی سندھ آن ثنیہ اول انعام دوئی کریر۔ صوبہ پنجاب آن علی رضا و صوبہ خیبرپختونخوا آن ایمان خالد ارٹ میکو انعام ءِ دوئی کرے وخت اس کہ خیبرپختونخوا آن ہی حنیف محمد و نورالھدیٰ مسٹ میکو پوزیشن ءِ ہلک۔ 15 آن 25 سال اسکان ارٹ میکو کیٹگری ٹی عزیر عالم مسن تیٹی عائشہ اکبر اول وخت اس کہ خیبرپختونخواآن تعلق تخوک آ سعید احمد شاہ و مغیرہ بتول ارٹ میکو پوزیشن ءِ ہلکر، پنجاب نا معین الحق و سندھ آن ماہ نور خان نعتیہ مقابلہ ٹی مسٹ میکو پوزیشن ءِ دوئی کریر۔ حوصلہ افزائی نا انعام بصارت آن محروم مسڑ حراکائنات ءِ تننگا۔
