اقوام متحدہ۔ 14 اکتوبر (اے پی پی) پاکستان اقوام متحدہ نا ہائی کمشنر انسانی حق مشل بیچلٹ آ زور شاغانے کہ او بھارت نا غیرکانودی کوزہ گیری ٹی جموں و کشمیر اٹی انسانی حق انا منظم خلاف ورزی تیا بھارت نا احتساب ءِ کے و اگہ داوڑ کننگتو تو داڑآن اونا دفترنا ساکھ پین زہمی مریک۔ اقوام متحدہ ٹی پاکستان نا نائب آخبتی نمائندہ عامر خان اقوام متحدہ نا جنرل اسمبلی نا راجی، دودوربیدگی و انسانی امور کن کاریم کروک آ مسٹ میکو کمیٹی ٹی اقوام متحدہ نا ہائی کمشنر انسانی حق مشیل بیچلٹ تون گپ وتران اٹی اودے بھارت نا غیرکانودی کوزہ گیری ٹی جموں و کشمیر اٹی بھارت نا انسانی حق انا پدریسہ خلاف ورزی تا بارواٹ معلومدار کرے و جاست وپاست نا خواست کرے۔ پاکستان نا نائب آخبتی نمائندہ اقوام متحدہ نا انسانی حق کونسل اٹ جموں و کشمیر اٹی بھارت نا کشمیری الس نا حق انا چندی خلاف ورزی تے تالان کننگ آ ہائی کمشنر نا منت واری ءِ ہرفسا پارے کہ اودے اومیت ءِ کہ ہائی کمشنر دفتر تینا رپورٹ اٹی جموں و کشمیر اٹی کوزہ گیر بھارتی فوج انا بھلو کچ اسے آ خلاف ورزی تے اوار کیک ہرافتے ٹی بھارت نا 9 لکھ فوجی تا مقبوضہ علاقہ غا کوزہ، ڈیموگرافک بدلی اتنگ کن 42 لکھ جعلی ڈومیسائل سرٹیفکیٹ جاری کننگ، پیلٹ گن آتا کاریم اٹ اتسا بھلو کچ اسے آ کشمیری تے بینائی آن محروم کننگ و عدالت آن ایڑتر ہزار آ بندغ آتا کسفنگ، کشمیری تا اُراتے دڑفنگ، بھلو کچ اسے آ زوراکی اٹ بندی، ظلم وجور، بیدادی ، عصمت دری ءِ جنگ انا سلہہ نا وڑاٹ کاریم اٹ اتنگ، اجتماعی قبرآتا خننگ وکشمیری تے غیب کننگ، انسانی حق انا مخ تفی، صحافی و میڈیا نا برخلاف کریک ڈاؤن، انٹرنیٹ و ٹیلی کمیونیکیشن نا بندمننگ اوار ءِ۔ پاکستان نا نائب آخبتی مندوب عامر خان پارے کہ 2018و 2019نا اقوام متحدہ نا ہائی کمشنر انسانی حق (او ایچ سی ایچ آر) نا دفترنا 2 رپورٹس، انسانی حق انا تنظیم و جہانی میڈیا داخلاف ورزی تا رپورٹنگ ءِ برجاتخانو وخت اس کہ اقوام متحدہ نا اسپیشل پروسیجرز مینڈیٹ ہولڈرز دا پڑو کرینے کہ جموں و کشمیر اٹی انسانی حق انا حالیت آک بھاز خراب ءُ۔ اوپارے کہ دادنیا نا غٹ آن بھلا جمہوریت نا طرز عمل ءِ، اواقلیت آتیا ہندوتوانظریہ ءِ مسلط کرینے و آزاد میڈیا، انسانی حق انا تنظیم و او ایچ سی ایچ آر ءِ ہروڑنا رسینگ تننگ ءِ پدریسہ مسترد کرسا کرینے۔ اوپارے کہ بھارت ءِ انسانی حق انا پدریسہ خلاف ورزی تیکن جوابدہ گودنگ اٹ بے سہبی اوایچ سی ایچ آر نا انسانی حق انا خلاف ورزی تا توننگ نا مینڈیٹ نا ساکھ و انسانی حق انا حالیت آتیا بے گچین مروک و بے کنڈہلوک غوروفکر ءِ پین چٹفک۔ اوہائی کمشنر آن خواست کرے کہ او جموں و کشمیر اٹی نسل کشی، انسانیت نا برخلاف ڈوہ و جنگی ڈوہ تا دمدستی جاست وپاست ءِ کے دُن مف کہ بھاز ہُرے مرے۔ اوہائی کمشنر آن جموں و کشمیر اٹی انسانی حق انا حالیت آتیا او ایچ سی ایچ آر نا بروک آ رپورٹ چوخت جاری مننگ نا بارواٹ ہریفے نیز داہم ہریفے کہ جموں و کشمیر اٹی انسانی حالیت آتیا 2018 و 2019 نا ہرا رپورٹ آتے پیش کننگاسس اوفتیا سلاہ و سوج آ عملدرآمد کن اوایچ سی ایچ آر انت گام گیج کرینے و اوایچ سی ایچ آر بھارتی حکومت تون اقوام متحدہ نا مبصرین، اسپیشل پروسیجرز(خصوصی وڑوڈول) و انسانی حق انا تنظیم تے جموں وکشمیر اسکان رسینگ نا موکل تننگ آ ہیت وگپ کننگ ءِ۔
