اسلام آباد۔ 13اکتوبر (اے پی پی) وزیراعظم عمران خان قومی موسمیاتی بدلی پالیسی 2021 و قومی وائلڈ لائف پالیسی 2021ء نا اصولی منظوری ءِ ترسا پارت کرینے کہ مارگلہ مش تیٹی اسہ خصوصی ءُ زون اسے شیر انا رکھ انا علاقہ گوندنگے وخت اس کہ اسلام آباد نا مرغزار چڑیاگھر اٹی وائلڈ لائف انفارمیشن سینٹر نا جوڑ کننگ نا ہم منظوری ءِ تننگا۔ چارشنبے نادے آ وزیراعظم عمران خان موسمیاتی بدلی نا بابت کمیٹی نا مسٹ میکو دیوان نا کماشی ءِ کرے۔ وزیراعظم عمران خان داوخت آپارے کہ پاکستان 10 ارب سونامی ٹری پروگرام نا سوب آن ’’گرین چیمپیئن‘‘ نا حیثیت اٹ تینا ساکھ ءِ برجاتخانے، دنیا پدتموک ملک آتے موسمیاتی بدلی نا اثرآتون مون تننگ اٹ کمک کے۔ وزیراعظم پارے کہ خیبرپختونخوا ٹی ننا حکومت 10 ارب سونامی ٹری نا بناءِ کرے و داسہ مچ آ دنیا ننا نقش قدم آ چلینگ انگ ءِ۔ اوپارے کہ جہانی برادری موسمیاتی بدلی نا اثرآتے کم کننگ کن پاکستان نا حقیقت پسندانہ و پبی گام گیج آتا ستاءِ کننگ ءِ۔ وزیراعظم وزارت موسمیاتی بدلی ءِ پارت کرے کہ قدرتی چاگڑدنا رکھ اکن مقررہ ہدف آتا جاچ ءِ ہلنگے و درکار پین دمدستی گام گیج آتا حامل پوسکن ءُ ہدف وضع کننگے۔ اوداہیت آ زور شاغا کہ پاکستان نا قومی پارک آتا رکھ غٹ آن اہم ءِ و ننے تربیت یافتہ افرادی قوت ءِ اوار و پوسکن آ ٹیکنالوجی ءِ کاریم اٹ اتنگے۔ وزیراعظم ’’قومی موسمیاتی بدلی پالیسی 2021‘‘ و ’’ قومی وائلڈ لائف پالیسی 2021‘‘ نا اصولی منظوری ءِ ترسا پارت کرے کہ مارگلہ مش تیٹی اسہ خصوصی ءُ زون اسے شیر انا رکھ انا علاقہ گوندنگے۔ اواسلام آباد نا مرغزار چڑیاگھر اٹی وائلڈ لائف انفارمیشن سینٹر نا جوڑ کننگ نا ہم منظوری ءِ تس۔ وزیراعظم چندی وزارت آتا نیام اٹ کوشست آتے مربوط کننگ و موسمیاتی بدلی نا چٹفنگ نا ایسری کن اسہ تھنک ٹینک اسے نا جوڑ کننگ نا ہم پارت کرے۔ اوچاگڑدی رکھ اکن ملک امین اسلم نا کوشست آتا ستاءِ کرے و دابشخ اٹی پاکستان نا کوشست آتے مون آ تخا۔ وزیراعظم نا خصوصی کمکار موسمیاتی بدلی ملک امین اسلم دیوان ءِ این ڈی سی، موسمیاتی بدلی نا پالیسی، قومی وائلڈ لائف پالیسی و گرین کلائمیٹ ڈپلومیسی نا بارواٹی سرجم معلومدار کرے۔ دیوان اٹی بنجائی وزیر شاہ محمود قریشی ، سید فخر امام ، محمد حماد اظہر، چوہدری مونس الہٰی،قومی سلامتی نا سلاہکار ڈاکٹر معید یوسف، وزیر مملکت زرتاج گل، وزیراعظم نا خصوصی کمکار ڈاکٹر شہبازگل ، وزیراعلیٰ بلوچستان جام کمال خان و وزیراعلیٰ گلگت بلتستان خالد خورشید۔ وزیراعلیٰ پنجاب سردار عثمان بزدار، وزیراعلیٰ خیبرپختونخوا محمود خان، وزیراعظم آزاد کشمیر سردار عبدالقیوم نیازی و وزیر ماحولیات سندھ اسماعیل راہو ئسک ویڈیو لنک انا کمک اٹ دیوان اٹی بشخ ہلکر۔

متعلقہ مضامینمصنف کی طرف سے مزید