امت مسلمہ ءِ مون تروک چیلنج آتا ایسر کننگ کن مسلم ملک آتا نیام اٹ سیوت و یکجہتی المی ءِ، اسپیکر قومی اسمبلی اسد قیصر

اسلام آباد۔ 13 اکتوبر (اے پی پی) اسپیکر قومی اسمبلی اسد قیصر پارینے کہ امت مسلمہ ءِ مون تروک چیلنج آتا ایسری کن مسلم ملک آتا نیام اٹ سیوت و یکجہتی المی ءِ، پاک ایران پارلیمان نا باسک آک ہڑتوم آ کنڈآتا تعلقداری تے پین سوگو کننگ اٹ اہم ءُ کڑد اس اداکننگ کیرہ۔ چارشنبے نادے آ او پارلیمنٹ ہاؤس اٹی ایرانی پارلیمانی ڈل اتون گپ وتران کریکہ۔ پاکستان نا دورہ غا بروک آ ایرانی پارلیمان اٹ ایران۔پاک سنگتی پڑک نا سروک احمد امیر عبادی فرحانی نا کماشی ٹی پاکستان نا دورہ غا بروک آ ایران نا پارلیمانی ڈل اسپیکر تون اوڑدہی کرے۔ اوڑدہی ٹی پاک۔ایران تعلقداری، ڈیہہ نا ساڑی حالیت آتون اوار تین پہ تینی است خواہی نا اہم باندات آ گپ وتران کننگا۔ اسپیکر پارے کہ پاکستان و ایران برادر اسلامی ہمسایہ ملک ءُ و ہڑتوم آ ملک آتا نیام اٹ تعلقداری مذہب، اخوت، تاریخ و ہمسائیگی نا بے مٹ رشتہ غاتیٹی تفوک ءُ ۔ پارلیمانی سفارتکاری پاکستان و ایران نا نیام اٹ تعلقداری تے سوگو کننگ اٹ اہم ءُ کڑد اس دا کننگ کیک ۔ ہڑتوم آ ملک آتا نیام اٹ تعلقداری ٹی ودکی علاقائی شونداری وشونہالی کن المی ءِ۔ واپار و توانائی نا بشخ آتے ٹی کمکاری ہڑتوم آ ملک آتا گچین فائدہ ٹی ءِ۔ ہڑتوم آ ملک آتا نیام اٹ واپاری کچ اٹی ودکی کن پاک ایران سیم آ واپاری سرجزآتیا خاص چکار تخنگ نا گرج ءِ۔ اوپارے کہ ساڑی حکومت ایران تون اوار غٹ ہمسایہ ملک آتون دوستانہ تعلقداری تے مون آ دننگ کن کوشست کننگ ءِ۔ مچ آ دنیا ٹی مسلم امہ ءِ مون تروک ویل آتا ایسری کن مسلم ملک آتا نیام اٹ سیوت وخت انا اہم ءُ گرج اسے۔ پارلیمانی سفارتکاری و السی کہول آ رابطہ ہڑتوم آ ملک آتا نیام اٹ اہم ءُ کڑد اس ادا کننگ کیک۔ ایرانی پارلیمانی ڈل انا ساڑی آ دورہ ہڑتوم آ ملک آتا نیام اٹ ہڑتوم آ کنڈآتا تعلقداری تے مون آ دننگ اٹ اہم ءُ مزل نا نشان اس مریک۔ پاکستان وایران نا کانود ساز ادارہ نا نیام اٹ کمکاری ءِ ودفنگ نا گرج ءِ۔