اسلام آباد۔ 13 اکتوبر (اے پی پی) وزیرخارجہ شاہ محمود قریشی اوغانستان اٹی سلامتی، سوگوی و اجتماعیت نا حامل سیاسی تصفیہ نا گرج آ زورشاغسا پارینے کہ اوغانستان اٹی ترندی اٹ مون آ بروک آ انسانی تنکی تون مون تننگ کن جہانی برادری ءِ ہلہلہ ئی بنداو تیا پبی گام گیج کروئی مریک۔ ترجمان دفترخارجہ نا رداٹ نیوزی لینڈ نا وزیر خارجہ ننایامہوٹا چارشنبے نادے آ تینا پاکستانی ہم منصب شاہ محمود قریشی تون بذریعہ ویڈیولنک رابطہ کرے۔ ہڑتوم آ وزیرخارجہ غاتا نیام اٹ ہڑتوم آ کنڈآتا تعلقداری، علاقائی خاص وڑاٹ اوغانستان نا مون آ بروک آ حالیت آتیا سرجم گپ وتران مس۔ وزیرخارجہ اوغانستان اٹی سلامتی، سوگوی و اجتماعیت نا حامل سیاسی تصفیہ نا گرج آ زور شاغا وپارے کہ اوغانستان اٹی ترندی اٹ مون آ بروک آ انسانی تنکی تون مون تننگ و اوغانستان نا انسانی و زرگزرانی کمکاری کن جہانی برادریءِ ہلہلہ ئی بنداو تیا پبی گام گیج کروئی مریک۔ اوپارے کہ ساڑی حالیت آتے گرج داہیت انا ءِ کہ اوغان تے تنیائی نا گواچی مننگ کن اِلنگپ۔ وزیرخارجہ نیوزی لینڈ نا وزیر خارجہ ءِ کابل آن پیش تمنگ نا عمل اٹ پاکستان نا کنڈآن تروک آ کمکاری آن معلومدار کرے۔ اوپارے کہ پاکستان 37 ملک آتا 21 ہزار باتی بشمول سفارتی عملہ و میڈیا نمائندہ غاتے کابل آن رکھ پیش تمنگ اٹ پبی کمک فراوان کرے۔ نیوزی لینڈ نا وزیر خارجہ نیوزی لینڈ تون اوار چندی ملک آتا شاری تے کابل آن رکھ کشنگ اٹ پبی کمک فراوان کننگ آ وزیرخارجہ مخدوم شاہ محمود قریشی و پاکستان نا سرکڑدہ غاتا منت واری ءِ ہرفے۔ وزیرخارجہ نیوزی لینڈ نا وزیر خارجہ ءِ بھارتی غیرکانودی کوزہ گیری ٹی جموں و کشمیر اٹی بھارتی کوزہ گیر فوج انا کنڈآن برجا انسانی حق انا بھلا خلاف ورزی تیان معلومدار کرے و پارے کہ نن ساڑی ہی ٹی، مقبوضہ جموں و کشمیر اٹی بھارتی کوزہ گیر فوج انا بھلا جنگی ڈوہ تا پبی شاہدی تیا مبنی ’’ڈوزئر‘‘ جہانی برادری نا مون آ پیش کرینے۔ وزیرخارجہ فیٹف نا بابت پاکستان نا کنڈآن چست کروک آ گچین گام گیج آتیان نیوزی لینڈ نا وزیر خارجہ ءِ معلومدار کرسا گمان ظاہر کرے کہ نیوزی لینڈ تکنیکی بنداو تیا پاکستان نا مخ تفی ءِ برجاتخک۔
