اسلام آباد۔ 13 اکتوبر (اے پی پی) بنجائی وزیر حوالکاری و شینکاری چوہدری فواد حسین پارینے کہ ملک اٹی کبینی نا بنداوی سوب مسکوہی حکومت آتا ہلوک آ وامک ءُ، حکومت داسال 12 ارب ڈالر نا وام تے پدی تروئی ءِ تو سبسڈی کن انت اس بچک، مسکوہی حکمرانک وام ہلسا پیشن نا ملک آتے ٹی جائیداد جوڑ کریر، دنیا نا 66 درسد آبادی اسلام آباد آن مسہ نیم گھنٹہ نا مسافت آٹی ءِ، پاکستان عرب ملک آتا فوڈ مارکیٹ اسکان رسینگ دوئی کننگ کیک، نن گڑاتو تیار کینہ ولے اوفتا سرٹیفکیٹ آ چکار کپنہ، ننے تینا گڑاتے جہانی آب انا رداٹ جوڑ کروئی مریک، بدبختی اٹ تدوک آ 20 سال آن نن ہرگڑاءِ پیشن آن خواہفنگ اُن، مچ آ دنیا ٹی گڑاتا نہاد آتے ٹی بے پناہ ودکی مسنے، ٹیکنالوجی ٹی زرکاری آن شونداری کننگ مریک، بھاز زوت پاکستان تینا نت تیا سلک۔ داخیال آتا درشانی ءِ او چارشنبے نادے آ داڑے سی ای او سمٹ آن تران کرساکرے۔ بنجائی وزیر حوالکاری پارے کہ جرمنی پاکستان آن کم و ود 300 آن 400 ملین ڈالر نا سرجیکل ازباب ہلسا بھارت ءِ 700 ملین ڈالر اٹ بہاکیک، ہرانا مطلب ءِ کہ ننتون تینا برآمد آتے ویلیو ایڈ کننگ آن بھازانگا وارخواہی ارے۔ اوپارے کہ پاکستان نا اسہ یکتا ءُ حیثیت اسے، دنیا ناکم و ود 66 درسد آبادی اسلام آباد آن مسہ نیم گھنٹہ نا مسافت آٹی ءُ۔ سعودی عرب، نیامی ایشیاء، بحرین، دوبئی نا فوڈ باسکٹ تینا چاگڑد نا سوب آن مدام درآمد آتیا مبنی سلک۔ پاکستان تینا فارمنگ ولائیو اسٹاک اٹ جدت اتسا عرب ملک آتا فوڈ مارکیٹ اسکان رسینگ دوئی کننگ کیک۔ بنجائی وزیر حوالکاری پارے کہ نن حلال اتھارٹی اس جوڑ کرین، سرٹیفیکیشن کرین، نن گڑاتے جوڑ کینہ ولے اوفتا سرٹیفیکیشن آ چکار کپنہ۔ اودود اٹی ساڑی غٹ سی ای اوز آتے پارے کہ او انت کہ گڑاس تیار کیر اونا کوالٹی ءِ جہانی آب انا رداٹ تخر۔ اوپارے کہ جہانی مارکیٹ اٹی کموڈیٹی پرائس اٹی ودکی مسنے، تیل انا نہاد آک ہم ودانو۔ 2018ء ٹی ہراتم پی ٹی آئی نا حکومت اقتدار اٹی بس تو پام آئل نا نہاد 518 ڈالر میٹرک ٹن ئس ہراداوخت آ 1200 ڈالر آن گدرینگانے، ہنداوڑ تیل و خولم نا نہاد آتیٹی ہم ودکی مسنے۔ اوپارے کہ کوویڈ نا سوب آن مچ آ دنیا ٹی انفلیشن بس۔ اگہ ننتون سرپلس ڈالر مرے تو نن پیشن نا دنیا غان کبین ءُ گڑا ہلسا سبسڈائز کرسا فراوان کننگ کینہ ولے ننتون ڈالر اف، ہرانا بنداوی سوب دادے کہ تدوک آ بیست سال اٹی نن تینا ہچ اس جوڑ کتون، نن ہراگڑاءِ پیشن نا ملک آن خواہفین۔ اوپارے کہ دوبئی اسہ چنکو شار اسے ہرانا سی آن چل لکھ آبادی ءِ۔ اونا زرگزران نا درور 22 کروڑ الس آ پورو سلنگ کپک۔ اوپارے کہ پاکستان اٹی انڈسٹری بندکننگاسس، غٹ گڑاتے درآمد کننگاکہ۔ اوپارے کہ کوویڈاٹی ننے سینی ٹائزر نا گرج ئس، ننتون ایتھانول مریک، نن رامٹیریل پیشن نا ملک آ گدریفینہ ولے تینا سینی ٹائزر جوڑ کتونہ۔ اوپارے کہ ہراتم 2018 ء ٹی نن اقتدار اٹی بسن تو ننا ٹیکسٹائل انڈسٹری بند مسوسس، نن اودے بحال کرین۔
