روم۔ 13 اکتوبر (اے پی پی) سرمایہ دار ملک آتا پڑک (جی 20) نا سروک آک اوغانستان اٹی انسانی تنکی آن بچنگ کن انسانی ہمدردی نا بنداو تیا امداد نا فراوانی نا کوشست آتے ترند کننگ نا چرجوئی ٹی اواری اٹ کاریم کننگ آ امناکرینو۔ فرانسیسی خبررساں ادارہ نا رداٹ اوغانستان اٹی خراب انسانی و اقتصادی حالیت آتیا گپ وتران کن اطالوی وزیراعظم ماریودراغی نا کماشی ٹی تدوک آ دے جی 20 ملک آتا سروک آتا ورچوئل دیوان اس اڈ ہلک ہراٹی داملک آک اوغانستان اٹی آجوجہانی آسودہی پڑک آتا کمک اٹ اوغان شاری تسکان براہ راست امداد سرکننگ نا اہمیت ءِ تالان کریر و داڑآ امنا کننگا۔ دیوان آن پد اطالوی وزیراعظم کانفرنس آن تران کرساپارے کہ جی 20 ملک آتے اوغانستان نا طالبان حکومت تون رابطہ ٹی مننگ نا گرج ءِ ولے رابطہ ٹی مننگ نا دامطلب اف کہ کابل انتظامیہ ءِ باضابطہ امنا کننگک۔ اوزورشاغاکہ ننے بیدس شرہ غان اوغان الس نا کمک ءِ کننگ نا گرج ءِ و داچرجوئی ٹی غٹ جی 20 ملک آک اوغانستان نا پین کمک ءِ کننگ آ امنا کرینو۔
