اسلام آباد۔ 12 اکتوبر (اے پی پی) اسپیکر قومی اسمبلی اسد قیصر تون وزیراعظم نا خصوصی کمکار بین المذاہب ہم آہنگی حافظ طاہر محمود اشرفی سے شنبے نادے آ اوڑدہی کرے۔ اوڑدہی ٹی رحمت اللعالمین ﷺاتھارٹی نا قیام، مسلم امہ ءِ مون تروک ویل و تین پہ تینی است خواہی نا ایلو باندات آ گپ وتران کننگا۔ اسپیکر پارے کہ وزیراعظم نا سیرت رحمت اللعالمین ﷺ اتھارٹی نا قیام و عشرہ رحمت اللعالمین اڈتننگ نا پڑو بھاز ستاکڑزوک ءُ گام اسے، عشرہ رحمت اللعالمین اڈتننگ وزیراعظم عمران خان نا خاتم النبین خواجہ صلی اللہ علیہ وآلہ وسلم تون والہانہ عقیدت نا درشانی ءِ۔ اوپارے کہ دیکی ٹی اسلاموفوبیا نا توننگ کن بین المذاہب ہم آہنگی نا مون آ دننگ وخت انا اہم ءُ گرج اسے، سیرت النبی صلی اللہ علیہ و آلہ وسلم آ عمل کرسا مسلم امہ ءِ مون تروک ویل آتا مون ءِ توننگ مریک۔ اوپارے کہ اسہ پرامن راج اسےنا ٹہیفنگ کن ورناتے سیرت النبی آن معلومدار کننگ المی ءِ۔ حافظ طاہر اشرفی پارے کہ رحمت اللعالمین ﷺ اتھارٹی نا قیام و عشرہ رحمت اللعالمین ﷺ اڈتننگ نا گام نا ملک انا تہہ و پیشن ستاءِ کننگانے، نومبر نااولیکو ہفتہ ٹی سیرت النبی ﷺ کانفرنس اڈتننگک۔ طاہر اشرفی اسپیکر قومی اسمبلی ءِ سیرت النبی ﷺ کانفرنس اٹ بشخ ہلنگ نا سلہ خلک و پارے کہ ربیع الاول نا تُواٹی مچ آ ملک اٹی سیرت النبی ﷺ کانفرنس اڈتننگک۔
