اسلام آباد۔ 12 اکتوبر(اے پی پی) وزیراعظم نا خصوصی کمکار فوڈ سیکورٹی جمشید اقبال چیمہ پارینے کہ بورہ نا نہاد آک بروک آ تُو آن کم مریرہ، 80 روپئی یااوکان ہم کم نہاد آ بورہ بہاکننگک ہرانا مانیٹرنگ ءِ حکومت کیک،ہنداسیزن اٹی گنڈیری نا پبی پیدوار مریک، ملک اٹی داوخت آ ہم بورہ نا نہاد جہانی مارکیٹ آتیان کم ءِ۔ داخیال آتا درشانی ءِ او سے شنبے نادے آ بورہ نا نہاد آتا بابت خصوصی گپ وتران کرساکرے۔ اوپارے کہ بورہ نا نہاد آک بروک آ تُوآن کم مننگ نا بناءِ کیرہ۔ اوپارے کہ رواں سیزن اٹی گنڈیری نا 100 ملین ٹن آن زیات پیدوار گمانی ءِ ہراڑآن اندازا9 ملین ٹن بورہ ودی مننگ کیک، ننا قومی گرج 6.1 ملین ٹن ءِ۔ اوپارے کہ داسال بورہ نا پیدوار یک و نیم سال انا گرج ءِ پورو کیک، نن گنڈیری نا کم از کم و زیات آن زیات نہاد مقرر کننگ تون اوار اوار بورہ نا نہاد ءِ ہم فکسڈ کننگ اُن۔ اوپارے کہ بزغرآتے گنڈیری نا نہاد ملنگ تون اوار اوار شوگر مل و پوریاگرآتے پورو منافع نا ادائیگی مننگ کیک۔ اوپارے کہ 80 روپئی یا اوکان کم نہاد آ بورہ بہاکننگک ہراحکومت نا کنٹرول و مانیٹرنگ اٹی مریک تانکہ کس اس اودے کبین سودا کننگ کپ۔ اوپارے کہ یکم نومبر آن شوگر مل آتے چلیفنگ اُن، یکم نومبر آن ہڑدے ئی بنداو آ بورہ نا نرخ آتے ٹی کمتی مننگ بناکیک اوپارے کہ نن 90 روپئی فی کلو بورہ فراوان کننگ اُن ہراانٹرنیشنل مارکیٹ آن بھاز کم ءِ۔ اوپارے کہ بروک آ سال نن جہانی مارکیٹ نا مقاگبلہ ٹی پیدوار پرخ اتون کم نہاد آ بورہ بہاکینہ، اوپارے کہ نن قوم اتون ہرا قول آتے کریسن ، اوفتے پورو کننگ اُن، ہرااجناس آتا پیدوار ننا جند انا ءِ، نن اوفتے جہانی مارکیٹ نا مقابلہ ٹی کم نہاد آ فراوان کینہ، اوپارے کہ حکومت گڑاتا قیمت و فروخت الس نا ہلنگ نا وس ءِ ہرسا مقرر کینہ، نُت انا نہاد آتیانبار بھاز زوت بورہ، سی و دال آتا نرخ ہم کم مریک، اوپارے کہ نُت، بورہ ، دال ، سی انا نہاد آتے ٹی پین کمتی مریک، سی اٹی ہم سبسڈی فراوان کینہ۔
