اقوام متحدہ۔ 12 اکتوبر (اے پی پی) اقوام متحدہ نا سیکرٹری جنرل انتونیوگوتریش اوغانستان نا زرگزران ءِ بھسکاری آن بچفنگ کن لیکوڈیٹی نا فراوانی آ زور شاغانے، اونا پاننگ ءِ کہ جہانی برادری اوغانستان ءِ انسانی ہمدردی تا بنداو آ امداد فراوان کے۔ چینی خبررساں ادارہ انتونیوگوتریش نا صحافی تتون گپ وتران نا بابت پارے کہ اگست اٹی طالبان تا کنٹرول آن مست اوغانستان نا زرگزران خراب ئس ہرادے 20 سال آن درملکی امداد نا سیبو دوئی ءِ، اوغان زرگزران خشک سالی و کورونا دین انا اثرآتیا دوچار ءِ و داسہ منجمد میرات و شونداری امدادنا سلنگ نا سوب آن دا بھسکاری نا کنڈآ ہِننگ ءِ، بینک بند مننگ ءُ، چندی جاگہ غاتیا جان جوڑی نا خیالداری و ایلو بنداوی آسراتیک معطل ءُ ہنداخاطرآن ننے اوغانستان نا زرگزران ءِ دُوارہ تینا نت تیا سلفنگ کن کسراس کشنگ نا گرج ءِ و دا جہانی کانود نا خلاف ورزی یا اصول آتیا سمجھوتہ کننگ آن بیدس ہم کننگ مریک، ہندن ءُ کسر اس کشنگ نا گرج ءِ ہراڑآن اوغان پروفیشنلز و سرکاری ملازم آک الس نا خذمت ءِ برجاتخنگ کیر۔ اودنیا غا زور شاغا کہ او اوغان زرگزران ءِ بھسکاری آن بچفنگ کن لیکوڈیٹی فراوان کننگ کن گام گیج کے انتئے کہ داوخت’’ابھی نہیں تو کبھی نہیں‘‘ والا لمحہ ءِ و اگہ نن دامشکل وخت اٹی اوغانستان نا زوت کمک ءِ کتون تو نئے بیرہ اوغانستان نا الس بلکن دنیا ءِ دانا بھلو قیمت اس تروئی تمک۔ اوخبڑدار کرے کہ خور، ملازمت، حق انا رکھ و ایلو گام گیج آتیان بیدس اوغان شاریک گچین زند انا پٹنگ اٹ تینا اُراتے ہلرہ وخت اس کہ ممنوعہ دوائی تا بہاؤ و ڈوہدار کسب و دہشت گرد آتا نیٹ ورک اٹی ودکی مریک ہراڑآن نئے بیرہ اوغانستان بلکن ڈیہہ ومچ آ دنیا بھاز بے وڑ زہمی مریک۔ اقوام متحدہ نا سیکرٹری جنرل پارے کہ لیکوڈیٹی نا فراوانی نا ویل ءِ ایلو ویل دُن کہ اوغانستان اٹی حکومت ءِ امنا کننگ یاکپننگ، پابندی و منجمد میرات آتا بابت سوج آتیان جتا وڑاٹ بایدے ایسر کننگے۔
