پاکستان زرکاری ءِ اتنگ کن متحدہ عرب امارات نا ماڈل آ عمل کننگ خواہک، گوادر بندرگاہ نیامی ایشیانا ریاست آتیان بھاز خڑک ءِ، صدر مملکت ڈاکٹر عارف علوی

اسلام آباد۔ 11 اکتوبر (اے پی پی) صدر مملکت ڈاکٹر عارف علوی پارینے کہ پاکستان زرکاری ءِ اتنگ کن متحدہ عرب امارات نا ماڈل آ عمل کننگ خواہک، گوادر بندرگاہ نیامی ایشیانا ریاست آتیان بھاز خڑک ءِ، داجہانی واپار کن اسہ ودکی اسے و متحدہ عرب امارات نا جبل علی پورٹ ہراکاریم کننگ ءِ دااودے ودفک، ہڑتوم آ بندرگاک اسہ ایلو ءِ سوگوکننگ کیرہ۔ امارات نیوز ایجنسی اسے تون اسہ خصوصی ءُ انٹرویو اسے ٹی صدر مملکت پارے کہ گوادر پورٹ مئی 2021ٹی پورو وڑاٹ آپریشنل مسنے و 50 ہزار ڈیڈ ویٹ بلک کیریئرز ءِ سنبھالنگ نا لائخی تخک۔ متحدہ عرب امارات نا وزیراعظم شیخ محمد تون تینا اوڑدہی و پاکستان ومتحدہ عرب امارات نا نیام اٹ سفارتی تعلقداری نا جوڑ کننگ نا 50 سال انا سال دے انا بارواٹی ہیت کرسا عارف علوی پارے کہ اوڑتون ملنگ آ بھاز خوشی مس، دنیا ٹی دبئی نا کڑد سفت نا قابل ءِ۔ دبئی کاروبار ءِ جوان چاہک، اوڑتون کچ اٹ وسیلہ ئس ولے او مچ آ دنیا نا وسیلہ غاتے تینا کنڈآ درے۔ صدر مملکت پارے کہ اوکنے تینا کتاب’میری کہانی‘ ءِ تس ہراکہ اردوٹیءِ و ای اودے ضرور خوانیوہ انتئے کہ اونا سوانح عمری ٹی است خواہی تخیوہ کہ او ہراوڑ بدلی نا سرکڑدہ ئی ءِ کرے و ولدا نی تینا ملک ءِ پوسکن آ بڑزی تیا دریس۔ دادبئی و متحدہ عرب امارات نا اسہ جتا ءُ آزموندہ اسے و ہندا دے نن پاکستان اٹی ہم کننگ خوانہ۔ اوپارے کہ متحدہ عرب امارات تون تعلقداری ٹی تدوک آ سال اٹی زبردست گچینی بسنے۔ ننا تعلقداری نا بنداو سوگو ءِ ہراایلمی و اسہ مشترک مذہب آ مبنی ءِ، متحدہ عرب امارات و پاکستان مدام امن کن کوشست کرینو۔ صدر عارف علوی پیدوار کرینے کہ اونا ملک داوڑوڈول آن بھاز گڑاہیل کننگ کیک ہراوڑ متحدہ عرب امارات تینے دنیا ٹی زرکاری و واپاری مرکز نا وڑاٹ پیش کرینے، پاکستان متحدہ عرب امارات آنبار اسہ پین کاروباری ڈومین اس جوڑ کننگ کن کوشست کننگ ءِ، دُن کہ ننتون خصوصی اقتصادی و برآمدی زون آک ءُ، ہراڑے صںعتی زرکاری نا است بڈی ءِ کننگ انگ ءِ۔ ننتون اسہ خصوصی ٹیکنالوجی زون اتھارٹی اس ہم ارے ہراڑے مخلوق سرمایہ اتنگ کیک و حکومت داہیت انا ضمانت ایتک کہ نم تینا سرمایہ و منافع ءِ کشنگ کیرے، ہچ ءُ خراج اس اف و دازرکاری نا جنت ءِ۔صدر مملکت متحدہ عرب امارات نا کمک اٹ تعلیم ءِ گچین کننگ، زالبول و پوسکن ودی مروک آ چناتا جان جوڑی نا خیال ءِ تخنگ، زالبول آتے واکدار کننگ و ڈیجیٹل زرگزران اٹ اوار مننگ کن گام گیج کننگ ءِ۔