اسلام آباد۔ 11 اکتوبر (اے پی پی) وزیرداخلہ شیخ رشید احمد پارینے کہ ڈالر ہورڈنگ اٹ اوار 88 بندغ ءِ دزگیر کننگانے وخت اس کہ 47 بندغ نا برخلاف ایف آئی آر درج کننگا و اوپن مارکیٹ اٹی ڈالر نا خریدوفروخت کروک آ5 کمپنی تا آڈٹ نا فیصلہ ءِ کرینن، اِرااِرا شناختی کارڈ تخوک آتا جرمانہ فیس 10 ہزار آن کم کرسا 5 ہزار کرینن، جعلی ویکسی نیشن سرٹیفکیٹ جوڑ کروک آتا برخلاف ایف آئی اے کارروائی کننگ ءِ، ڈاکٹر عبدالقدیر خان نا ایچ ایٹ قبرستان اٹ جہہ جاگہ کننگ نا فیصلہ اونا خاہوت نا ئس۔ دوشنبے نادے آ پریس کانفرنس آن تران کرسا بنجائی وزیر داخلہ شیخ رشید احمد پارے کہ ڈاکٹر عبدالقدیر نا نماز جنازہ غا وزارت داخلہ گچین بست وبند کرے و محسن پاکستان ءِ وزارت داخلہ سرکاری اعزاز اتون جہہ جاگہ کرے، اوپارے کہ وزیراعظم عمران خان نا پارت ئس کہ ڈاکٹر عبدالقدیر ءِ فیصل مسجد اٹ جہہ جاگہ کننگے ولے اُراوالا تا مرضی اٹ اودے ایچ ایٹ قبرستان اٹ جہہ جاگہ کننگا۔ اوپارے کہ کنا جند انا کوشست ئس کہ ڈاکٹر عبدالقدیر خان ءِ فیصل مسجد اٹ جہہ جاگہ کننگے ولے اودے جہہ جاگہ اونا خاہوت نا مرضی اٹ ایچ ایٹ قبرستان اٹ کننگا۔ اوپارے کہ اونا جنازہ ٹی پِر آن پد ہم بھلو کچ اسے ٹی مخلوق بشخ ہلک و ایلو شارتیٹی ہم غائبانہ نماز جنازہ ءِ خواننگا۔ اوپبی بست وبند آ وزارت داخلہ ، پولیس ، سی ڈی اے، انتظامیہ پاک فوج انا کارندہ و رینجرءِ خراج تحسین پیش کرے۔ وزیرداخلہ پارے کہ ڈالر نا کوڑی کروک آتا برخلاف ایف آئی اے کارروائی کرسا 88 بندغ ءِ دزگیر کننگا وخت اس کہ 47 بندغ آتا برخلاف ایف آئی آر درج کننگا۔ اوپن مارکیٹ اٹی ڈالر نا خریدوفروخت کروک آ 5 بھلا کمپنی تا آڈٹ نا فیصلہ ءِ کرینن۔ اوپارے کہ این سی او سی ءِ بدنام کننگ کن جعلی اندراج کننگ انگ ءِ ، ایف آئی اے ءِ جعلی ویکسی نیشن نا برخلاف کارروائی نا پارت کرینن۔ اوپارے کہ اِرااِراشناختی کارڈ نا جرمانہ فیس ءِ 10 ہزار آن کم کرسا 5 ہزار کرینن، اِرا اِراپاسپورٹ تخوک آ بندغ آتا ہم جرمانہ فیس 5 ہزار مریک ہراناکابینہ غان منظوری ءِ ہلنگک۔ اِرا پاسپورٹ تخوک آ بندغ 30اکتوبر اسکان اسہ پاسپورٹ ءِ سرنڈر کننگ کیک ولے تاریخ اٹی ودکی ہم کننگ کینہ۔ اوپارے کہ کسٹمز ڈیپارٹمنٹ وزارت داخلہ نا ماتحت اف، ننا کاریم بیرہ ڈالر نا کوڑی کننگ نا جاست وپاست ءِ۔
