گورنر بلوچستان تون چیئرمین این ڈی ایم اے نا اوڑدہی

کوئٹہ۔ 11 اکتوبر (اے پی پی) گورنر بلوچستان سید ظہور احمد آغا پارینے کہ ہلہلہ ئی حالیت آتون مون تننگ و قدرتی آفت آتے ٹی کمکی سرجزآتے برجاتخنگ نا بابت این ڈی ایم اے نا اہم ءُ کڑد اسے، ہرنائی ٹی زمی جمب آن مروک آ نسخان تا ازالہ ءِ کننگ کن حکومت و الس نا اسیجائی کوشست آتے خنسا کاٹم گمراٹ بڑزامسنے، داخیال آتا درشانی ءِ او دوشنبے نادے آ گورنر ہاؤس اٹی چیئرمین این ڈی ایم اے لیفٹیننٹ جنرل اختر نواز تون اوڑدہی ٹی گپ وتران کرسا کرے۔ گورنر بلوچستان پارے کہ ہروڑنا ہلہلہ ئی حالیت آتون وخت آ مون تننگ زندہ قوم تا نشانی ءِ۔ اوپارے کہ دا ننا شاندار قومی قدر و روایت ءِ ہرانا بنداو آ نن مشکل نا داساہت اٹ اسٹ مرینہ۔ اوپارے کہ ساڑی آ زمی جمب آن مروک آ جانی و مالی نسخان تا ازالہ کن امداد و بحالی نا سرجزآتے ٹی ترندی اتوئی مریک و ٹھپی تے درمان نا غٹ تر آسراتی فراوان کننگ آن بیدس کمکی گڑاو مشینری نا دوئی کننگ ءِ پک کننگک۔ اوپارے کہ صدر مملکت ڈاکٹر عارف علوی و وزیراعظم پاکستان عمران خان زمی جمب نا نسخان آتون دمدستی وڑاٹ مون تننگ کن تعلقدار ادارہ غاتے پارت جاری کریر۔