کابل۔ 11 اکتوبر (اے پی پی) اوغانستان نا وزارت خارجہ امریکہ نا کنڈآن اوغانستان ءِ انسانی بنداو تیا امداد فراوان کننگ آ رضامندی ظاہر کننگ نا ستاءِ کرساپارینے کہ انسانی بنداو تیا امداد ءِ سیاسی ویل آتون بایدے اوارکننگپ۔ طالبان نا ترجمان ذبیح اللہ مجاہد وزارت خارجہ نا بیان نا بابت دوشنبے نادے آ تینا ٹویٹ اٹی پارے کہ امارات اسلامی اوغانستان و امریکہ نا نیام اٹ 2 دے ئی مذاکرات جوان مس و داٹی چندی سیاسی ویل آتیا سرجم گپ وتران کننگا۔ اوپارے کہ اوغانستان ویل آتا ایسری کن دوحہ معاہدہ غا پورو عملدرآمد ءِ گچین ءُ کسر اس گوندا وپارے کہ انسانی امداد ءِ سیاسی ویل آتون بایدے اوار کننگپ۔ اوپارے کہ امریکی نمائندہ غاک اوغان شاری تے امداد فراوان کننگ و ایلو تنظیم تے امداد نا فراوان کننگ کن آسراتی فراوان کننگ آ رضامندی ظاہر کرے ہرانا امارات اسلامی اوغانستان ستاءِ کیک۔ اوپارے کہ اوغانستان شفاف بنداوتیا ضرورت مند بندغ آتے امداد نا فراوانی ٹی کمک کیک درملکی شاری تا کشنگ اٹ کمک فراوان کیک۔ اوپارے کہ امریکہ تون مروک آ گپ وتران اٹی غٹ تعلقدار ویل آتیا گپ وتران کننگا و اوغانستان ءِ گچین ءُ ریاست اس جوڑ کننگ کن سفارتی تعلقداری تا بحالی کن کوشست آتے بایدے ترند کننگے۔ اوپارے کہ امریکہ تون گپ وتران ءِ اسہ ایلوءِ سمجھنگ نا گچین ءُ موقع اس سمجھنہ وداہیت آ امنا کننگاکہ اگہ ضرورت تما تو آخبت اٹ داوڑنا پین گپ وتران اڈتننگک۔
