اسلام آباد۔ 11 اکتوبر (اے پی پی) وزیراعظم عمران خان نا خصوصی پارت آ خصوصی کمکار سینیٹر ڈاکٹر ثانیہ نشتر بنجائی حکومت آن درکار مالی کمکاری نا جاچ ءِ ہلنگ کن ہرنائی نا زمی جمب آن زہمی علاقہ غاتا دورہ ءِ کرے، دورہ غان پد او وزیراعظم نا منظوری آ ہرنائی نا غٹ خاہوت آتے کن بنجائی حکومت نا نغد امداد نا پیکج نا پڑو ءِ کرے۔ ڈاکٹر ثانیہ نشتر زہمی تتون یکجہتی نا درشانی ءِ کرسا پارے کہ راجی رکھ پروگرام زمی جمب آن زہمی بندغ آتا بحالی کن اہم ءِ، بنجائی حکومت ہرنائی نا غٹ خاہوت آتے دمدستی امداد نا وڑاٹ 12،000روپئی نغد ایتک، داکمکاری ءِ احساس پروگرام نا رداٹ کننگک۔ اونا پاننگ ئس کہ دا امداد زہمی خاہوت آتے کن نسخان تا سرجم تشخیص آن پد انا معاوضہ غان بیدس مریک۔ ہرنائی ٹی ڈاکٹر ثانیہ نشتر تون اوار ڈپٹی اسپیکر قومی اسمبلی قاسم خان سوری، چیف سیکرٹری بلوچستان مطہر نیاز رانا، منیجنگ ڈائریکٹر پاکستان بیت المال ملک ظہیر عباس کھوکھر، کمشنر سبی ڈویژن، ڈپٹی کمشنر ہرنائی و احساس و پاک فوج انا سینئر آفیسر آک ساڑی ئسر۔ ڈاکٹر ثانیہ مچ آ ضلع ٹی مروک آ جانی و مالی نسخان تیا است ہسونی نا درشانی ءِ کرے و خلق کلی شور و تحصیل ہرنائی نا ایلو علاقہ غاتیا ہنسا زہمی خاہوت آتیان اوفتا طب انا اَریفے۔ زہمی بندغ آتون ہمدردی کرسا ڈاکٹر ثانیہ پارے کہ بنجائی حکومت دامشکل وخت اٹی ہرنائی نا مخلوق تون تفوک ءِ و اوفتے دمدستی ریلیف فراوان کننگ کن ہرممکن کوشست کننگک، اونا پاننگ ئس کہ نن زہمی جمب آن زہمی تا کمک کن سنبرینگوک اُن و احساس نا شاک ریسپانسیورجسٹری ہم زہمی علاقہ غاتے ٹی دوشنبے اسکان تینا ڈیسک اس جوڑ کیک۔ اومحکمہ آبپاشی ہرنائی ٹی احساس رجسٹریشن ڈیسک اس ملنگ نا بست وبند آتا ہم جاچ ءِ ہلک۔ ہرنائی ٹی احساس قومی راجی و اقتصادی رجسٹری سروے پورو مسنے۔ رجسٹریشن ڈیسک تینٹ اندراج اٹ ہمو اُراتے آسراتی فراوان کیک ہرافتے احساس نا کمک درکار ءِ۔ داکان مست ڈاکٹر ثانیہ ڈسٹرکٹ ہسپتال ہرنائی نا ہم دورہ ءِ کرے و زمی جمب اٹی ٹھپی مروک آتون اوڑدہی کرے۔ تدوک آدے او سول ہسپتال کوئٹہ و گورنر بلوچستان ظہور آغا تون اوار سی ایم ایچ آ ہم ہنا ہراڑے درمان مروک آ زہمی تا جان پڑسی ءِ کرے۔ وزیراعظم نا پارت آتا رداٹ ضلع ہرنائی ٹی مخلوق ءِ تیار کُن وخور فراوان کننگ کن ’’احساس کس اس لنگڑ خاچپ‘ نا اِرا فوڈ ٹرک ہم اینو کاریم نا بناءِ کرینو۔ یات سلے کہ 7 اکتوبر 2021آ بلوچستان نا چندی علاقہ غاتے ٹی تباہ کن زمی جمب اس بسوسس، صوبائی دارالحکومت کوئٹہ غان دے ٹک اٹ بروک آ دا زمی جمب آن غٹ آن زیات زہمی مروک آ ضلع ہرنائی ءِ۔
