قومی سلامتی کمیٹی نا کنڈآن اسہ وتواجہ، سوگو و پرامن اوغانستان اسے نا پاکستان نا عزم انا درشانی، وزیراعظم نا اوغانستان نا بابت کروک آ کوشست آتے ہم گرنچ کننگ کن خصوصی ءُ سیل اس جوڑ کننگ نا پارت

اسلام آباد۔ 08 اکتوبر (اے پی پی) قومی سلامتی کمیٹی اسہ وتواجہ، سوگو و پرامن اوغانستان اسے نا پاکستان نا عزم انا درشانی ءِ کرسا جہانی برادری آ زور شاغانے کہ او اوغانستان اٹی انسانی تنکی تون مون تننگ کن کمک کے وخت اس کہ وزیراعظم عمران خان پارت کرے کہ اوغانستان نا بابت کروک آ کوشست آتے ہم گرنچ کننگ کن خصوصی ءُ سیل اس جوڑ کننگے۔ جمعہ نادے آ قومی سلامتی کمیٹی نا 34 می دیوان وزیراعظم عمران خان نا کماشی ٹی اڈ ہلک ہراٹی اوغانستان نا ساڑی آ حالیت آتیا گپ وتران کننگا۔ دیوان اٹی بنجائی کابینہ نا تعلقدار باسک آک، غٹ سروسز چیفس و انٹیلیجنس ادارہ غاتا سروک آک بشخ ہلکر۔ وزیراعظم ءِ علاقائی سلامتی نا حالیت خاص وڑاٹ اوغانستان اٹی مروک آ پیش رفت و اونا پاکستان آ ممکنہ اثرآتیا سرجم حوال تننگا۔ قومی سلامتی کمیٹی اسہ وتواجہ ، پرامن و سوگو اوغانستان نا پاکستان نا عزم انا درشانی ءِ کرے۔ کمیٹی ٹی بشخ ہلوک آک اوغانستان اٹی خراب انسانی حالیت آتیا گڑتی نا درشانی ءِ کرسا پاریر کہ گرج داہیت انا ءِ کہ جہانی برادری انسانی تنکی تون مون تننگ کن کمک کے۔ دیوان اٹی اوغانستان نا عبوری حکومت تون تعمیری، سیاسی و اقتصادی گپ وتران نا بابت جہانی رابطہ غاتا اہمیت ءِ مون آ تخنگا۔ وزیراعظم عمران خان اوغانستان آن جہانی پیش تمنگ نا کوشست آتے ٹی پاکستان نا کمکاری آ است جمی نا درشانی ءِ کرساپارے کہ مچ آ دنیا پاکستان نا دامثبت کمکاری ءِ امنا کرینے۔ کمیٹی باسک آک ڈیہہ نا بدل مروک آ حالیت آتے بھاز پیچیدہ گوندسا پاریر کہ اوغانستان اٹی ہروڑنا نزوری نا پاکستان آ ہم بھاز مضمرات مننگ کیک۔ دا نقطہ نظرآن امنا کرسا وزیراعظم دارداٹ مربوط پالیسی کوشست آتا گرج آ زور شاغا۔ اوپارت کرے کہ انسانی امداد نا فراوانی و پاکستان اٹ ہروڑنا منفی اثرآتے توننگ و گچین بارڈر مینجمنٹ کن اسہ مخصوص ءُ سیل اس جوڑ کننگے تانکہ اوغانستان اٹی چندی کوشست آتے ہم گرنچ کننگ مرے۔