ملکی سیاست اٹ 120 دے اہم، بروک آ گچین کاری تیٹی ہم عمران خان سرسہب مریک،شیخ رشید احمد

راولپنڈی۔ 08 اکتوبر (اے پی پی) بنجائی وزیر داخلہ شیخ رشید احمد ملکی سیاست اٹ بروک آ 120 دے ءِ اہم گوندسا پارینے کہ عمران خان نا کماشی ٹی بروک آ گچین کاری تیٹی ہم پبی وڑاٹ بشخ ہلینہ و سرسہبی عمران خان نا مریک، گچین کاری تا خڑک (ن) لیگ نا پوسکن آ الائمنٹ مریک، دابے شرفی نا آخا سنجیدہ سیاسی سوچ انا وخت ءِ، اگہ نن سنجیدہ سیاست کینہ تو داملک ءِ مون آ دینہ۔ داخیال آتا درشانی ءِ او جمعہ نادے آ راولپنڈی ویمن یونیورسٹی ٹی پوسکن آ پوسٹ گریجویٹ بلاک نا بناءِ کننگ نا وخت آ دود آن تران و میڈیا تون گپ وتران کرسا کرے۔ بنجائی وزیر داخلہ شیخ رشید احمد پارے کہ خدانخواستہ اگہ اوغانستان اٹی تنکی اس مس تو نن داتنکی آن زہمی مرینہ، کنے خوشی داہیت انا ءِ کہ عمران خان کورونا نا دین انا حالیت آتے ہم بھاز جوان وڑاٹ ہینڈل کرینے و اوغانستان نا ویل ءِ ہم گچین وڑاٹ ایسر کننگ انگ ءِ، ای ہموسیاست دان افٹ ہرا کبینی آن انکار کے، ملک اٹی کبینی ءِ ولے انشاء اللہ وزیراعظم عمران خان نا کماشی ٹی دادے کنٹرول کینہ و ہموفک ہراننا ادارہ غاتا برخلاف ہیت کرسا نمبر ہلنگ نا کوشست کننگ ءُ او بوز اٹ کنیرہ۔پاکستان نا عظیم قوم، پاکستان نا عظیم فوج ءِ عمران خان نا کماشی ٹی نن انشاء اللہ گچین پراگریس کینہ۔ اللہ نا شکر ءِ ادا کیوہ کہ کنا زند اٹی تعلیم نا مشن پورو مسنے، ہندا تُو اٹی راولپنڈی ٹی مسٹ میکو یونیوسٹی، وقارالنساء یونیورسٹی نا بناءِ وزیراعلیٰ پنجاب کیک، تعلیمی پلان اٹ ڈھوک آتے گچین کرین، ڈھوک حسو، ڈھوک رتہ پین پین انتئے کہ انگریز آک داکان لیبر ہلکرہ و اوخواتورہ کہ داڑے تعلیم مرے، اینو بیرہ ڈھوک حسو نا اسہ کالج اٹی پنچ ہزار طالب علم خواننگ ءُ، راولپنڈی شارطالب علم آتا تعلیم نا لحاظ اٹ پاکستان اٹ نمبرون ءِ، دانا کریڈٹ عمران خان و عثمان بزدار ءِ کاہک۔ ہنداہفتہ بہبود اسکول نا ہم کوزہ ءِ ہلکونن و اودے انٹرمیڈیٹ کالج اٹ بدل کرینن۔ نالہ لئی ڈٹ انا بناءِ ہم زوت کننگک، زند مہلت تس تو اسہ آئی ٹی یونیورسٹی اس پین جوڑ کیوہ، اوکان پد ہسپتال آتے وخت ایتیوہ، 20وینٹی لیٹر ہولی فیملی ہسپتال ءِ تسونن، 100 پین ڈائلاسز مشین ہم ایتنہ۔ اوپارے کہ کنا زند انا مشن ءِ کہ نزور واکدار مرے، ای اسہ نزور ءُ بندغ اس اسُٹ۔ اللہ کنے واکدار کرے، راولپنڈی ءِ کس اس شکست تننگ کپک انتئے کہ راولپنڈی نا مسنک خوانندہ ءُ۔ کنکن شرف نا ہیت اسے کہ کنا شار انا رکشہ ڈیور نامسڑ سی ایس ایس اٹ ٹاپ کرینے، راولپنڈی ویمن یونیورسٹی ٹی اسہ ہزار طالب علم آتا ہاسٹل نا بست وبند ءِ داخاطرآن کننگانے کہ داڑے ٹیکسلا گوجرخان چکوال و ایلو علاقہ غاتیان ہم مسنک تعلیم کننگ کن بریرہ، راولپنڈی ویمن یونیورسٹی ہاسٹل آ 40 کروڑ روپئی خڑچ بس و پوسکن آ تعلیمی بلاک آ 13 کروڑ روپئی لگا۔ اسہ سوج اسے نا ورندی ٹی شیخ رشید احمد پارے کہ گچین کاری تا خڑک ن لیگ نا پوسکن آ الائنمنٹ مریک، و ای نون لیگ ءِ ارٹ نا جاگہ غا مسہ پڑک آتے ٹی خننگ اُٹ، دافک عمران خان نا لائخی تے انڈراسٹیمیٹ کننگ ءُ، غٹ ویل آتے گچین وڑاٹ و جوانی اٹ ہینڈل کینہ، طورخم بارڈر ملوک ءِ، چمن بارڈرآ زرس ویل مسنے اودے ہم سہی کینہ، اوغانستان نا سلامتی و امن ننے ہم زہمی کیک۔