اسلام آباد۔ 08 اکتوبر (اے پی پی) وزیر مملکت حوالکاری و شینکاری فرخ حبیب پارینے کہ بنجانا وار وار آ پاننگ آن پد ہم سندھ حکومت سرکاری خولم ءِ ریلیز کپننگ ءِ، داڑآن سندھ اٹی خولم 2400 روپئی من و 20 کلو تھیلا 1500 روپئی اسکان سرمسنے، بلاول حکومت سندھ انا الس ءِ مافیا تا رحم و کرم آ انت اکن ہلانے، الس نا کنڈآن سلاہ بریک ولے ہچ ءُ دُن ءُ گام اس ہرفپنہ ہراڑآن غیر جمہوری رویہ مون آ برے، بنجا سندھ انا الس ءِ نئے مہالو تنیا اِلا و نئے داسہ تنیا ہِلک ۔ او جمعہ نادے آ خصوصی کمکار بحری امور محمود مولوی و سندھ آن ایم این اے سیف الرحمان تون اوار پریس کانفرنس آن تران کریکہ۔ وزیر مملکت حوالکاری و شینکاری فرخ حبیب پارے کہ سندھ حکومت خولم و نُت انا باندات اٹ الس آ ظلم کننگ ءِ، سندھ حکومت ہرسال الس نا خراج آن ہلوک آ سرکاری خولم تے وخت آ ریلیز کپک۔ اوپارے کہ پنجاب و خیبرپختونخوا ٹی سرکاری ریٹ1950 روپئی آ خولم وخت آ جاری کرے۔ داڑآن نُت انا نہاد آتے ٹی سوگوی مس، اینو ہم پنجاب و کے پی کے ٹی 20 کلو نُت انا تھیلا1100 روپئی نا ءِ۔ اوپارے کہ پیپلزپارٹی سندھ اٹی 13 سال آن حکومت کننگ ءِ، سندھ انا الس تون دشمنی کننگ انگ ءِ، بلاول زرداری نا سندھ حکومت الس آن اِراوخت انا باخو ءِ ہم پُلنگ ءِ۔ اوپارے کہ 5 اکتوبر آ وزارت غذائی رکھ سندھ حکومت ءِ سرکاری خولم ریلیز کننگ کن دُوارہ چھٹی اس نوشتہ کرے ولے داتم اسکان اوڑآ عمل متنے، سندھ حکومت ءِ ہچ ءُ پرخ اس تمپک، الس ءِ خولم، نُت مافیا تا رحم وکرم آ ہلانے، حکومت سندھ انا کنڈآن سرکاری خولم ءِ وخت آ ریلیز کپننگ نا سوب آن اینو سندھ اٹی خولم 2400 روپئی فی من و نُت 20 کلو تھیلا 1400 آن 1500 روپئی بہامننگ ءِ، دانا زموار بلاول و سندھ حکومت ءِ، داکبین بہاکروک و مافیاتا کاٹم خواجہی ءِ کننگ ءُ، بلاول پائےآخر ہراوخت اسکان سندھ انا الس ءِ مافیا تا رحم وکرم آ ہلک۔ پنجاب نا آبادی غٹ آن زیات ءِ اوکان پد ہم سرکاری خولم وخت آ جاری کرے و نتیجتا نُت انا نہاد کم ءِ، سندھ حکومت آن خواست ءِ کہ دمدستی وڑاٹ سرکاری خولم ءِ ریلیز کے۔
