اسلام آباد۔ 08 اکتوبر (اے پی پی) بنجائی وزیر بین الصوبائی رابطہ ڈویژن ڈاکٹر فہمیدہ مرزا پارینے کہ پاکستانی گوازی تا صنعت جوان مون آ ہنسا زرگزران نا شونداری ٹی فعال کڑدادا کننگ کیک، حکومت اسلام آباد و سیالکوٹ چیمبرز آف کامرس اینڈ انڈسٹری نا شریداری اٹ سپورٹس گڈز انا اسہ ایکسپو اس اڈتننگ آ سجفنگ ءُ تانکہ سپورٹس گڈز انا واپار و برآمد آتے جوان مون آ دننگے۔ داخیال آتا درشانی ءِ او اسلام آباد چیمبرآف کامرس اینڈ انڈسٹری نا اسہ ڈل اسے تون گپ وتران کرسا کرے ہراچیمبر نا صدر محمد شکیل منیرنا کماشی ٹی اوڑتون اوڑدہی کرے۔ فاؤنڈر پڑک نا چیئرمین میاں اکرم فرید، چیمبرنا سینئر نائب صدر جمشید اخترشیخ و نائب صدر فہیم خان ڈل اٹی اوار ئسر۔ پاکستان اسپورٹس بورڈ انا ڈائریکٹر جنرل کرنل(ریٹائرڈ) محمد آصف زمان، ٹوکیو اولمپکس 2021اٹی جیولین نا گوازی ٹی فائنل اٹ سرمروک آ پاکستانی گوازی گر ارشد ندیم و ویٹ لفٹنگ اٹ پنچ میکو پوزیشن ءِ ہلوک آ طلحہ طالب ہم داوخت آ ساڑی ئسر۔ ڈاکٹر فہمیدہ مرزا پارے کہ حکومت گوازی گر آتا اسہ ایلیٹ پینل اس تیار کننگ کن کوشست کننگ ءِ تانکہ او گوازی تا پڑاٹ پاکستان نا پن ءِ جوان روشنا کننگ کیر ہنداخاطرآن اوداہیت آ زور شاغا کہ بزنس کمیونٹی داوڑنا گوازی گرآتا ہرممکن مالی کمک ءِ کے تانکہ او گوازی تا جہانی مقابلہ غاتے ٹی بشخ ہلسا پاکستان کن پین جہانی اعزاز دوئی کننگ کیر۔
