اسلام آباد۔ 08 اکتوبر (اے پی پی) ایوان صدر نا جامع مسجد آن نماز جمعہ و خطبہ ءِ براہ راست نشر کننگا۔ صدر مملکت ڈاکٹر عارف علوی، اسلامی نظریاتی کونسل نا چیئرمین ڈاکٹر قبلہ ایاز و ایوان صدر نا کمامدارآک و عملہ جمعہ نا نماز ءِ خوانار۔ داوخت آ چیئرمین اسلامی نظریاتی کونسل ڈاکٹر قبلہ ایاز خطبہ تس۔ اوتینا خطبہ ٹی عبادت آتون اوار اوار ہڑدے ئی باندات آتے ٹی گچینی نا اہمیت ءِ مون آ تخا۔ اورسول اکرم صلی اللہ علیہ و آلہ وسلم نا سیرت آن حسن اخلاق، احترام انسانیت و صلہ رحمی نا پلو آتے تالان کرے و پارے کہ خواجہ صلی اللہ علیہ و آلہ وسلم نا کڑد و شخصیت ننکن رول ماڈل اسے، ننے منبر و محراب و میڈیا نا کمک اٹ داصفت آتے لس کننگ نا گرج ءِ، ہرافتیا عمل کرسا ننا راج گچینی نا کنڈآ ہِننگ کیک۔ داوخت آ ملکی سلامتی، شونداری و شونہالی کن دعا کننگا۔ صدر مملکت ڈاکٹر عارف علوی داکان مست تینا اسہ ٹویٹ اسے ٹی پاریسس کہ الس نا رہنمائی کن ایوان صدر آن ہر جمعہ غا 15 منٹ اکن گچین ترانکارآک خطبہ ایترہ۔
