اسلام آباد۔ 08 اکتوبر (اے پی پی) امریکہ نا نائب سیکرٹری آف اسٹیٹ وینڈی شرمن قومی سلامتی نا سلاہکار ڈاکٹر معید یوسف تون اوڑدہی کرینے۔ پاک امریکہ ڈل آتا اوڑدہی ٹی تین پہ تینی باندات و ڈیہہ ٹی بدل مروک حالیت آتیا گپ وتران کننگا۔ اوڑدہی ٹی زرگزرانی کمکاری، واپار، ڈیہہ نا سیکورٹی حالیت و اوغانستان آ گپ وتران کننگا۔ اوڑدہی خوشگوار چاگڑداٹی مس، و فریق آک ہڑتوم آ ملک آتا نیام اٹ ہڑتوم آ کنڈآتا تعلقداری نا گچینی نا است خواہی نا درشانی ءِ کریر۔ داوخت آ معید یوسف پارے کہ جہانی برادری ءِ اوغانستان نا پوسکن آ عبوری حکومت تون ہیت کننگ و رابطہ غاتے برجاتخنگ نا گرج ءِ۔ اوپارے کہ بھارتی غیرکانودی کوزہ گیری ٹی کشمیر اٹی بھارت نا انسانی حق انا خلاف ورزیک ڈیہہ ٹی امن کن خطرہ ءُ۔ امریکی ڈل اوغانستان آن پیش تمنگ و اوغان مہاجر آتا کمک ءِ کننگ آ پاکستان نا کڑد انا ستاءِ کرے۔
