اسلام آباد۔ 08 اکتوبر (اے پی پی) بنجائی وزیر حوالکاری و شینکاری چوہدری فواد حسین پارینے کہ کانود نا حکمرانی و آئین نا بالادستی ٹی وکیل آتا کڑد تاریخ نا اہم ءُ بشخ اسے، وکیل آک جمہوریت، انسانی حق و آئین نا محافظ ءُ۔ داہیت ءِ او اوڑدہی کن بروک آ ڈسٹرکٹ بار جہلم نا عہدیدار آتون گپ وتران کرساپارے۔ اوڑدہی ٹی نیب انا ساڑی آ آرڈیننس تون اوار ایلو اہم باندات آ گپ وتران مس۔ وکلابرادری بنجائی وزیر حوالکاری ءِ جہلم اٹی کنٹونمنٹ بورڈز انا گچین کاری تیٹی پاکستان تحریک انصاف نا شاندار سرسہبی آ مبارکبادی تس۔ وکیل آک گچین کاری اصلاحات و بروک آ گچین کاری تے ای وی ایم آ کرفنگ نا بابت حکومتی گام گیج آتا ستاءِ کریر۔ داوخت آ گپ وتران کرسا بنجائی وزیر حوالکاری وکیل آتے نیب(ارٹ میکو ترمیمی) آرڈیننس 2021ء نا سرجم آتیان معلومدار کرسا پارے کہ صدر مملکت آئین نا آرٹیکل 89 نا رداٹ داآرڈیننس ءِ جاری کرے۔ آرڈیننس نا کمک اٹ صدر مملکت و چیف جسٹس آف پاکستان نا سلابت اٹ احتساب عدالت آتے جوڑ کننگک۔ پراسیکیوٹر جنرل نا واکداری تے ودفنگانے، دا آرڈیننس نا رداٹ ضمانت نا اختیار داسہ ماتحت عدالت آتون مریک۔ اوپارے کہ اینو ہرا نیب آرڈیننس آ تنقید کننگ ءِ اونا گیشتر ترمیم ہندا آرڈیننس اٹی اوار ءِ۔ بنجائی وزیر حوالکاری پارے کہ حکومت وکلابرادری نا ویل آتیان جوانی اٹ معلومدار ءِ، ڈسٹرکٹ بار جہلم کن پوسکن ءُ چیمبرجوڑ کننگک، ورناوکیل آتے چیمبر آتا تفنگ کن سرسہب ورنا پروگرام آن وام تننگک، وکلابرادری ءِ جان جوڑی نا آسراتی نا فراوانی کن ہیلتھ کارڈ انا فراوانی آ ہم سجفنگ اُن۔ بنجائی وزیر حوالکاری وکیل آتے جہلم اٹی شونداری کاریم تا بابت معلومدار کرساپارے کہ دریائے جہلم نا خڑک آ پوسکن ءُ سیل و سواتی پارک جوڑ کننگک۔ اوپارے کہ للہ آن پنڈدادنخان و جہلم سڑک ءِ دورویہ کننگ نا ڈٹ آن علاقہ ٹی شونداری نا پوسکن آ دور بناکیک، 126 کلومیٹر مرغن للہ آن جہلم اسکان دورویہ سڑک نا تفنگ آ 16 ارب روپئی نا خڑچ بریک۔ وکلا برادری علاقہ نا شونداری و الس نا راجی آسراتی نا ڈٹ آتا بناء آ بنجائی وزیر حوالکاری چوہدری فواد حسین، ایڈووکیٹ جنرل پنجاب فیصل چوہدری و سرفراز چوہدری نا کوشست آتا ستاءِ کرے۔ اوڑدہی ٹی ڈسٹرکٹ بار جہلم نا صدر راجہ توقیر احمد خان، جنرل سیکرٹری راجہ نصراللہ وسیم، جوائنٹ سیکرٹری چوہدری آصف بشیر ایڈووکیٹ،پنجاب بار کونسل نا باسک راجہ ظفراقبال، مسکوہی صدر ڈسٹرکٹ بار جہلم چوہدری عبدالرشید گوندل، پنجاب بار کونسل نا مسکوہی باسک راجہ شکیل احمد ایڈووکیٹ، راجہ محمد فاروق رضا، مسکوہی جنرل سیکرٹری ڈسٹرکٹ بار جہلم چوہدری محمد حکیم الرسول ایڈووکیٹ، ملک رضوان احمد ایڈووکیٹ، شاہد عزیز گوندل ایڈووکیٹ، چوہدری نوید امتیاز ایڈووکیٹ، پنجاب بار کونسل نا مسکوہی وائس چیئرمین چوہدری محمد حسین ایڈووکیٹ و ارشد محمود جنجوعہ ایڈووکیٹ ئسک اوار ئسر۔
