اسلام آباد۔ 08 اکتوبر (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ 8 اکتوبر 2005 نا زمی جمب اٹی کشمیریک اسہ پورو ءُ چین اسے گوہار، ننے تینا بروک آ چین تے ودوک آ قدرتی آفت آتیان رکھ تخنگ کن منظم ڈٹ بندی اٹ کاریم کروئی ءِ۔ 8 اکتوبر 2005 نا المناک زمی جمب نا 16 سال پورو مننگ آ کلہواٹی اوپارے کہ 16 سال نا بھلو وخت اس تدینگ انگ آن پد ہم زہمی الس نا است آتے ٹی تینا دوست آتا یات و غم اینو ہم زندہ ءِ، 2005 نا المناک زمی جمب اٹی کشمیری الس تینا پورو اسہ چین اسے گوہار۔ اوبلوچستان اٹی زمی جمب نا نتیجہ ٹی جانی و مالی نسخان آ ڈکھ و است ہسونی نا درشانی ءِ کرساپارے کہ نن تینا بروک آچین تے ودوک آ قدرتی آفت آتیان رکھ تخنگ کن منظم ڈٹ بندی اٹ کاریم کروئی ءِ۔ علی امین گنڈاپور پارے کہ چاگڑدی کچٹی و گلوبل وارمنگ نا نتیجہ ٹی پاکستان ءِ بے پناہ چیلنج مون تروک ءِ ، وزیراعظم عمران خان موسمیاتی بدلی تتون مقابلہ کننگ کن تینا اسہ وژن اس تخک، وزیراعظم عمران خان نا بلین ٹری ڈٹ انا جہانی کہول آ ستاءِ کننگ انگ ءِ۔ علی امین گنڈاپور پارے کہ تعمیرات نا بشخ انا شونداری ءِ جغرافیائی خدوخال نا رداٹ جوڑ کروئی ءِ۔ قدرتی آفت آتے سگنگ کن تعمیراتی کوڈز و کانود نا سختی اٹ اطلاق المی ءِ۔ علی امین گنڈاپور پارے کہ پاکستان تحریک انصاف نا حکومت ہر بشخ اٹ مافیاتا چٹفنگ کن جنگ تننگ ءِ، حکومت شفاف طرزحکومت اٹ ہربشخ اٹ آب ومیرٹ ءِ پک کننگ ءِ۔
