اسلام آباد۔ 08 اکتوبر (اے پی پی) بیلجئیم اٹی کاریم کروک آ پاکستانی خواری کش آتا زررادہ کننگ اٹ برجامالی سال اٹی تدوک آ مالی سال انا ہندا مد انا مقابلہ ٹی 39.7درسد نا نمومسنے۔ اسٹیٹ بینک انا کنڈآن دا بابت دوئی حساب وکتاب نا رداٹ جولائی و اگست نا تُواٹی بیلجیئم اٹی کاریم کروک آ پاکستانی کارندہ غاک 52.6 ملین ڈالر نا زرمبادلہ ملک آ مون تسر ہرا تدوک آ مالی سال انا ہندا مد انا مقابلہ ٹی 39.7درسد زیات ءُ، تدوک آ مالی سال انا ہندا مد اٹی بیلجیئم اٹی رہینگوک آ پاکستانیک 37.7 ملین ڈالر نا زرمبادلہ ملک آ مون تسوسر۔ اگست 2021اٹی بیلجیئم اٹی کاریم کروک آ پاکستانیک 25.1 ملین ڈالر نا زرمبادلہ ملک آ مون تسر ہراتدوک آ سال اگست نا مقابلہ ٹی 268 درسد زیات ءُ، تدوک آ سال اگست اٹی بیلجیئم اٹی رہینگوک آ پاکستانیک 14.1 ملین ڈالر نا زرمبادلہ مون تسوسر۔ ساڑی حکومت نا کنڈآن کانودی و بینکنگ ذریعہ اٹ زررادہ کننگ نا است بڈی کن گام گیج و ترغیب آتا نتیجہ ٹی سمندر پار پاکستانی تا زررادہ کننگ اٹ پدریسہ ودکی مننگ ءِ۔ برجامالی سال انا اولیکو اِراتُو اٹی سمندرپار پاکستانی تا زررادہ کننگ اٹ تدوک آ مالی سال انا ہندا مدانا مقابلہ ٹی جم وڑاٹ 10.4 درسد ودکی مسنے۔
