اسلام آباد۔7اکتوبر (اے پی پی):بلوچستان ءِ دمگ ہرنائی ءَ 5.9 درجگ ترندی ءِ زمین چنڈ ءِ نتیجگ ءَ 20 مردم بیران ء ُ 300 ءَچہ گیش ٹپیگ بوتگ اَنت۔ زمین چنڈ ءِ جھڑکا صوبائی حکومت کوئٹہ ءَ ابید سبی، ہرنائی، پشین ، قلعہ سیف اللہ ، چمن ، زیارت ء ُژوب ءَ ہوار دگہ بازیں دمگاں بوتگ ۔ پروو نشل ڈیزاسٹر میجنمنٹ اتھارٹی (پی ڈی ایم اے) بلوچستان ءِ گشگ ءِ ردءَ چارءُ شمبے ء ُ پنچ شمبے ءِ درنیامی شپ 3 بج ء ُ 2 منٹ ءَ زمین چنڈ بوتگ کہ بازیں لوگ ء ُجاگہ کپتگ کہ آئی ء َ چہ 20 مردم بیران ءُ 300 ءَچہ گیش مردم ٹپیگ بوتگ اَنت۔ ریسکیو وسیلگ ءِ ردء َ ہرنائی ءَ 70 ءَ چہ گیش لوگانی نقصان رسیتگ۔ تہی کارانی صوبائی وزیر میرضاء اللہ لانگو ءَ میڈیا ءَ را حال داتگ کہ آماچیں صوبہ آنی درائیں ضلع آں ایمرجنسی کنگ بوتگ تنکہ کمکی سُرءُ پُر ءُجانء ُ سلامتی ءِ ازمت دیئگ بہ بنت۔ آئی ءَ گشتگ کہ آماچیں دمگاں ہیلی کاپٹر دیم دیئگ بوہگءَ اَنت کہ تنکہ ٹپیگیں مردماناں زوتاں چہ زوت نادراہ جاہ ءَ سربہ کن اَنت۔ پاکستان ءِ نیشنل سیسمک مانیٹرنگ سینٹر ءِ گشگ ءِ ردءَ زمین چنڈ ءِ ترندی ریکٹرسکیل ءِ سرءَ 5.9 ریکارڈ کنگ بوتگ کہ آئیءِ بُنجاہ کوئٹہ ءَ چہ 102 کلومیٹر رودرآتک ءِ نیمگ ءَ ہرنائی ءِ نزیک ء ُ زمین ءَ چہ 15 کلومیٹر جُہل بوتگ۔ پی ڈی ایم اے بلوچستان ءِ ڈائریکٹر جنرل نصیر ءَ کمکی ٹیم آماچیں دمگاں سربوتگ اَنت ء ُکمکی کار بندات کنگ بوتگ۔ پی ڈیم ایم اے ءِ صوبائی سروک ءَ گشتگ کہ بنداتی حالانی ردءَ ضلع ہرنائی ءَ کم چہ کم سے کوچگ درستاں چہ گیش آماچ بوتگ اَنت کہ 70 ءِ نزیک ءَ لوگ ء ُ جاگہ کپتگ اَنت۔ ہرنائی ءِ ڈپٹی کمشنر سہیل انور ہاشمی ءَ حال داتگ کہ جون ء ُ ٹپیگاناں نزیکیں نادراہ جاہ ءَ سرکنگ بوتگ، آئی ءَ گشتگ کہ بیران ء ُ ٹپیگ بوتگیں مردمانی تہءَ زالبول ء ُ زھگ ہم ہوار اَنت۔ عہدگ داراں میڈیا ء َ را حال داتگ کہ بیران بوتگیں مردمانی کساس گیش ہم بوت کنت۔ ٹپیگانی تہ ءَ کم چہ کم 15 مردمانی حالت ناگیگ اَنت لھتیں مردم تاں انگت لوگانی چیرءَ چیر تر اِتگ اَنت۔
