کابل۔ 04 اکتوبر(اے پی پی) طالبان نا ترجمان ذبیح اللہ مجاہد پارینے کہ اوغانستان نا دارالحکومت کابل اٹی مسیت اسے آ داعش نا شکبر جلہو آن پد مجاہد آتا اسپیشل یونٹ داعش نا برخلاف آپریشن کرینے ہراٹی داعش نا ٹھکانہ بھس و داٹی ساڑی داعش نا غٹ باسک آک خلنگانو۔ فرانسیسی خبررساں ادارہ نا رداٹ ذبیح اللہ مجاہد دوشنبے نادے آ تینا ٹویٹ اٹی پارے کہ یک شنبے نا نن آ کابل اٹ قطب اٹ داعش نا برخلاف آپریشن کننگا ہراسرسہب و فیصلہ کن ئس و داآپریشن اٹی داعش نا ٹھکانہ بھس و اوٹی ساڑی داعش نا غٹ باسک آک خلنگار۔ فرانسیسی خبررساں ادارہ پارے کہ کارروائی ٹی چندی طالبان کمانڈوز آک بشخ ہلکر و دا کیہی گھنٹہ برجائس۔ کارروائی ٹی کابل نا ایب وکیب اٹ واقع مسہ اُراتے شست کننگا و داٹی دھماکہ و سم کاری نا توار ءِ بِننگا۔ یات سلے کہ دا آپریشن تدوک آ دے دارالحکومت کابل اٹ عئید گاہ ٹی طالبان نا ترجمان ذبیح اللہ مجاہد نا لمہ جیجا کن دعائیہ دود اٹی مروک آ جلہو آن پد کننگا۔ مسیت اٹی دعائی دود آ مروک آ دا جلہو اٹی پنچ بندغ زوال کریسر۔ ذبیح اللہ مجاہد پارے کہ داواقعہ نا جاست وپاست داسکان برجاءِ ولے بنائی حوال آتا رداٹ داہیت انا گمان ءِ کہ دا جلہو داعش تون منسلک پڑک اس کرے۔
