اٹاوہ۔ 30 ستمبر (اے پی پی) کینیڈاٹی پاکستان نا قائم مقام ہائی کمشنر امیر خرم راٹھور پاکستانی پردیسی تے خراج تحسین پیش کرسا پارینے کہ پاکستانی کمیونٹی داجاگہ ناراجی، دودوربیدگی وسیاسی زند اٹ پبی کڑد ادا کرینو، ساڑی آ گچین کاری تیٹی کم وود سی پاکستانی نژاد کینیڈین نا بشخ ہلنگ و اوفتیان شش بندغ نا پارلیمنٹ نا باسک انا وڑاٹ گچین مننگ داہیت انا شاہدی ءِ کہ پاکستانی کمیونٹی داڑے تینا پنی ءُ درستی راستی اس جوڑ کرینوہراآخبت اٹ پین سوگو مریک اوداہیت انا درشانی ءِ پاکستانی ہائی کمیشن کینیڈا و قونصلیٹ آف پاکستان ٹورنٹو نا کنڈآن اڈ ہلوک آ اسہ ای کچہری سے آن تران کرساکرے۔ اوٹی پاکستان قونصل جنرل ٹورنٹو عبدالحمید، پاکستان قونصل جنرل مانڑیال اشتیاق احمد عاقل وپاکستان قونصل جنرل وینکوورجانبازخان تون اوار پاکستانی کمیونٹی نا اسہ بھلو کچ اس بشخ ہلکر۔ اسہ گھنٹہ برجاسلوک آ ای کچہری ٹی جانشینی سرٹیفکیٹ نا دوئی کننگ، پیشن نا ملک رہینگوک آ پاکستانی تیکن بینکنگ و خراج آن تعلقدار آن لائن خذمت آتا پائیدار فراوانی، اسٹوڈنٹ ڈائریکٹ سٹریم سکیم نا رداٹ کینیڈا نا یونیورسٹی وکالج آتے ٹی پاکستانی طالب علم آتا داخلہ غاتا کچ ءِ ودفنگ، کمیونٹی کہول آ یوم آزادی و ایلو قومی دے تے اڈتننگ، روشن ڈیجیٹل اکاؤنٹس ملنگ نا دروشم اٹ خراج نا ویل، نائیکوپ نا آسان تجدید و ٹورنٹو ٹی نادرا آسراتی سینٹر نا جوڑ کننگ کون آ باندات آتیا شرہ مس۔ ای کچہری آن تران کرسا ہائی کمشنر امیر خرم راٹھور پارے کہ او و اونا ٹیم کینیڈا نا تعلیمی ادارہ غاتے ٹی پاکستانی طالب علم آتا کچ ءِ ودفنگ و اسٹوڈنٹ ڈائریکٹ سٹریم نا رداٹ کینیڈاٹی بڑزکو تعلیم نا خواہندار طالب علم آتا راہشونی کن نومبراٹی اسہ آن لائن تعلیمی نمائش اسے نا بست وبند ءِ کینہ ہراٹی کینیڈا وپاکستان آن بڑزکو تعلیمی ادارہ و سٹڈی پرمٹ نا کسبی خذمت فراوان کروک آ ادارہ غاک بشخ ہلیرہ۔ اوپارے کہ پاکستان ہائی کمیشن نا کنڈآن ماہانہ ای کچہری نا اڈتننگ نا مسخت کینیڈاٹی رہینگوک آ پاکستانی کمیونٹی تون پدریسہ رابطہ و سلابت وفیڈ بیک نا چرجوئی ءِ بحال تخنگ ءِ ہرادے آخبت اٹ ہم برجاتخنگک۔
