کابل۔ 30 ستمبر (اے پی پی) چین نا اوغانستان کن ہلہلہ ئی کمکی گڑاتا پوسکن آ کھیپ کابل بالی پٹ آ سرمس۔ چینی خبررساں ادارہ نا رداٹ چین نا کنڈآن عطیہ کروک کمکی گڑاتا بابت دود کابل بالی پٹ آ مس ہراٹی اوغانستان اٹی چینی سفیر وانگ یو و اوغان نگران حکومت نا مہاجرین امور نا قائم مقام وزیر خلیل الرحمان حقانی ئسک ساڑی ئسر۔ وانگ یو دوداٹی پارے کہ چین نا کنڈآن اوغانستان کن تروک آ ہلہلہ ئی کمکی گڑاتے ٹی کمبل، جیکٹ و سیڷ انا ایلوگڑاک اوار ءُ ہرافتا اوغان الس ءِ دمدستی گرج ءِ۔ اوپارے کہ چین خور اتون اوار ایلو کمکی گڑاتا تیاری ءِ برجاتخک و اوفتے بھاز زوت اوغان الس اسکان سرکننگک۔ داوخت آ اوغان قائم مقام وزیرخلیل الرحمان حقانی کمکی گڑاتا فراوان کننگ آ چین نا منت واری ءِ ہرفے انتئے کہ بھاز انگا اوغان شاریک مشکل وخت اتون مون تننگ ءُ۔ اینخو سال انا بناآن پد آن، 634،000آن زیات اوغان شاری ملک اٹی جھیڑہ غاتا سوب آن بے اُرا مسنو۔ سرکاری حساب وکتاب نا رداٹ 2012آن پد آن داتم اسکان کم وود 5.5 ملین اوغانی ہمپینو۔
