بیجنگ۔ 28 ستمبر (اے پی پی) چین اٹی پاکستان نا سفیر معین الحق پارینے کہ حکومت پاکستان ای کامرس نا شونداری آ چکار کننگ ءِ، چین ای کامرس نا میدان اٹ دنیا نا کماشی ءِ کننگ ءِ، تدوک آ سال اونا ای کامرس لین دین 2ٹریلین ڈالر ئس ہراکہ امریکہ ویورپ اٹی دابشخ اٹی مروک آ ودکی آن زیات ءِ۔ داخیال آتا درشانی ءِ او چین نا دارالحکومت بیجنگ اٹ ’’ڈیجیٹل بیلٹ اینڈ روڈ‘‘ نا سرحال آ مروک آ چارمیکو بیلٹ اینڈ روڈ سروس ٹریڈ کارپوریشن فورم آن تران اٹی کرے۔ اوپارے کہ پاکستان دابھلا مارکیٹ آن فائدہ ہرفنگ کن تینا ای کامرس انفراسٹرکچر نا مون آ دننگ، ٹیلی کمیونیکیشن سیکٹر ءِ اپ گریڈ و ای پیمنٹ(ادائیگی) نا نظام ءِ پوسکن کننگ خواہک۔ داوخت آ چین نا ایئر والکس گریٹر چائنہ کمپنی نا سی ای اووکائی پارے کہ ادائیگی نا بنداوی پنجر نا بلڈر نا وڑاٹ ننا ادائیگی نا خذمت 50بیلٹ اینڈ روڈ ملک آتا احاطہ ءِ کیک، دُن کہ پاکستان نا ای کامرس ترندی اٹ شون ہلنگ ءِ ننا بھاز انگا گیراک آک خاص وڑاٹ ای کامرس نا صارف پاکستان تون اکثر زرگزرانی تبادلہ کیرہ۔ اونا پاننگ ئس کہ اہم زیات گچین وڑاٹ کم خڑچ آن زرتس ءِ ممکن کننگ کینہ داڑتون اوار اوار تینا صارف آتا مالیاتی خطرہ غاتا مون ءِ توننگ اٹ کمک ہم فراوان کننگ کینہ۔ چائنا اکنامک نیٹ انا رپورٹ نا رداٹ کوویڈ۔ 19 بیلٹ اینڈ روڈ ملک آتا ڈیجیٹل اکانومی ڈویلپمنٹ ءِ ترند کننگ ءِ و زیات آن زیات جہانی واپار ڈیجیٹل زرتس انا خذمت آتا طالب ءِ۔ ووکائی ڈیجیٹل زرگزران نا شونداری ٹی بینکاری نظام نا اہمیت ءِ ہم مون آ تخا۔ اوپارے کہ فی الحال گڑاس بیلٹ اینڈ روڈ ملک آتون جوان مالی پنجر اف ، ننا سروس نا بنداو دادے کہ ادائیگی کروک و موصول کروک ہڑتوم آ بینک اکاؤنٹ مرے۔
