اقوام متحدہ۔ 06اپریل (اے پی پی) پاکستان پارینے کہ سلامتی کونسل نا آخبتی باسک آتیٹی ودکی کرسا اودے زیات نمائندہ، جمہوری و جوابدہ جوڑ کننگ کپک۔ داہیت ئِ اقوام متحدہ ٹی پاکستان نا آخبتی مندوب ڈاکٹر ملیحہ لودھی سلامتی کونسل نا تشکیل نو نا بارواٹی تعطل نا گواچی مذاکرات دُوارہ بناءمننگ نا وخت آ پارے۔ غیر آخبتی باسک آتا کچ اٹی ودکی آن کونسل ئِ زیات نمائندہ جوڑ کننگ اٹی ہچ ئُ کمک اس ملیپک ، سلامتی کونسل نا تشکیل نو بارواٹی ہیت و گپ اٹی تعطل بھارت، برازیل، جرمنی و جاپان آ تالان گروپ آف فور انا دا موقف آ ودی مسوسس کہ اوفتے سلامتی کونسل نا آخبتی رکنیت تننگے۔ پاکستان و اٹلی نا سروکی ٹی اسہ بھلو رڑاس یونائیٹڈ فارکنسن سی (یو ایف سی) دا سلاہ نا پبی مخالفت ئِ کرے و اوکان پد اسہ پوسکن ئُ سلاہ اس پیش کرے کہ کونسل نا پوسکن آ کارندہ غاتے کن اسہ پوسکن ئُ کیٹگری اس جوڑ کننگے ہرافتا رکنیت نا مد ساڑی غیر آخبتی باسک آتیان زیات مرے، پاکستانی مندوب دا وخت آ پارے کہ سلامتی کونسل نا پوسکن جوڑ مننگ اٹی بریبری جغرافیائی و علاقائی بشخ وپانٹ بایدے بنداوی اصول آ مرے۔
