اسلام آباد۔ 05اپریل (اے پی پی) قومی تاریخ و ادبی میرات ڈویژن کن وزیراعظم نا سلاہکار عرفان صدیقی پارینے کہ نظریہ پاکستان قومی یکجہتی و ملکی سوگوی نا ضمانت ئِ۔ نظریہ نا داقومی امانت ئِ ورنانسل اسکان گدریفنگ کن علمی و تاریخی ادارہ غاتے اہم کڑد ادا کروئی مریک۔ او نظریہ پاکستان کونسل نا دیوان آن تران کریکہ ہرا سلاہکار وزیراعظم نا کماشی ٹی قومی تاریخ و ادبی میرات ڈویژن اٹی اڈ ہلک۔ عرفان صدیقی پارے کہ قائداعظم و علامہ اقبال نا افکار نا ترویج اسہ قومی ئُ زمواری اسے۔ و دا مسخت کن کاریم کروک آ غیر سرکاری ادارہ غاتا پبی سرپرستی ئِ کننگک ۔ وزارت قومی تاریخ و ادبی میرات دُن انگا ادارہ و بندغ آتے کن کمکاری ئِ قومی فرض سرپند کرسا اداکرسا کیک۔ اوپارے کہ قائداعظم و علامہ اقبال کون آ عظیم شخصیت آتیا کاریم کروک آ ادارہ و بندغ آک ننا نہادی سرمایہ ئُ۔ دیوان اٹی نظریہ پاکستان کونسل نا جاری و آخبت نا ڈٹ جات نا بابت چندی معاملہ غاتیا خیال آتا درشانی ئِ کننگا و مون تروک ویل آتا بابت سلاہ غاتیا سجفنگا۔ سلاہکار وزیراعظم عرفان صدیقی دارداٹ ہر وڑکمکاری ئِ باوری ترفے۔ نظریہ پاکستان کونسل نا عہدیدار آک قائداعظم ، علامہ اقبال و نظریہ پاکستان نا مون آ دننگ کن عرفان صدیقی نا خذمت آتا ستائِ کرسا پارے کہ دا قومی مسخت آتا مون آ دننگ کن اسہ علمی و ادبی شخصیت بے کچ جوان گچین ئِ۔ دیوان اٹی نظریہ پاکستان کونسل نا چیئرمین ڈاکٹر نعیم غنی، سینئر وائس چیئرمین میاں محمد جاوید، ایگزیکٹو سیکرٹری گوہر زاہد ملک آن بیدس ادارہ نا ایلو باسک میجر جنرل (ر) محمد طاہر، ڈاکٹر بشارت جذبی ، ظہیر احمد چوہدری، بنجائی سیکرٹری قومی تاریخ و ادبی میرات ڈویژن انجینئر عامر حسن ، ڈپٹی سیکرٹریز محمد سہیل مفتی ، نذیر احمد و ایلو کمامدارآک ساڑی ئسر۔
