اسلام آباد۔ 06اپریل (اے پی پی) وزیراعظم محمد نواز شریف پارینے کہ پاکستان و جرمنی نا نیام اٹ اسہ وڑنا خیالات و کثیر الجہتی کمکاری تون عبارت دوستانہ و کمکاری آ مبنی تعلقداریک استوار ئُ، ساڑی حکومت جرمنی تون ہڑتوم آ کنڈآتا اقتصادی تعلقداری تا مون آ دننگ نا خواہندار ئِ۔ اوداہیت ئِ جرمنی نا وزیراقتصادی کمکاری و شونداری ڈاکٹر گیر ڈمولر تون پنچ شنبے نا دے وزیراعظم ہاﺅس اٹی ہیت وگپ کرسا پارے۔ وزیراعظم جرمن وزیر ئِ پارے کہ پاکستان نا معیشت اٹی صفائُ گچینی اس بسنے وخت اس کہ سیکورٹی نا حالیت آک ہم مستین نا مقابلہ ٹی اینو بھاز جوان ئُ۔ اوپارے کہ ننا مون آ بروک آ جمہوری تشخص ساڑی حکومت نا کنڈآن جمہوری اصول و کانود نا رداٹ غٹ سیاسی ویل آتون مون تننگ آن عیاں ئِ۔ وزیراعظم پارے کہ اونا حکومت جرمنی تون ہڑتوم آ کنڈآتا اقتصادی تعلقداری تا مون آ دننگ نا خواہندار ئِ۔ دارداٹ اوتین پہ تینی اقتصادی تعلقداری تا پین مون آ دننگ کن ہڑتوم آ کنڈآتا چیمبر آف کامرس نا اڈتننگ نا سلاہ تس۔ جرمن وزیراقتصادی کمکاری و شونداری شاندار مہمان نوازی آ وزیراعظم نا منت واری ئِ ادا کرسا چندی بشخ آتیٹی پاکستان تون کمکاری ئِ پین سوگوی تننگ نا عزم انا درشانی ئِ کرے۔ جرمن ڈل اٹی جرمن سفیر اینالیپل، بی ایم زیڈ نا ڈائریکٹر جنرل برن ہارڈ فیلم برگ، ڈاکٹر ہیننگ پلیٹ و اول سیکرٹری ہیڈ آف کوآپریشن ڈاکٹر زول جیورجن اوار ئسر۔ اوڑدہی ٹی وزیر خزانہ اسحاق ڈار، وزیراعظم نا خصوصی کمکار طارق فاطمی و ایلو سینئر کمامدارآک ہم ساڑی ئسر۔
