اسلام آباد، نیویارک۔ 22ستمبر (اے پی پی) پاکستان و پرتگال نا السی رابطہ و ہڑتوم آ کنڈآتا کمکاری ءِ مون آ دننگ کن ہڑتوم آ ملک آتا پارلیمنٹری فرینڈ شپ پڑک آتے پین متحرک کننگے، پرامن و سوگو اوغانستان نئے بیرہ پاکستان کن اہمیت تخک بلکن ڈیہہ نا امن وایمنی کن اوغانستان اٹی امن و ایمنی المی ءِ۔ وزیرخارجہ مخدوم شاہ محمود قریشی اقوام متحدہ نا جنرل اسمبلی نا 76می دیوان نا وخت آ پرتگال نا وزیر خارجہ آگستوسینتوس سلواتون اوڑدہی کرے داوخت آ تین پہ تینی است خواہی، علاقائی و جہانی باندات تون اوار اقوام متحدہ نا فورم آ ہڑتوم آ ملک آتا کمکاری آ گپ وتران کننگا۔ وزیرخارجہ پرتگال تون پاکستان نا تین پہ تینی تعلقداری خاص وڑاٹ اقتصادی و واپاری رابطہ غاتے پین ودفنگ نا است خواہی نا درشانی ءِ کرے۔ اوہڑتوم آ ملک آتا پارلیمنٹری فرینڈ شپ پڑک آتیا پت انا درشانی ءِ کرے ہراہڑتوم آ ملک آتا پارلیمان اٹی جوڑ کننگانو اوپارے کہ پاکستان و پرتگال نا السی رابطہ و ہڑتوم آ کنڈآتا کمکاری ءِ مون آ دننگ کن داپڑک آتے پین متحرک کننگے۔ علاقائی امن و سوگوی نا بابت پاکستان نا عزم انا درشانی ءِ کرسا وزیرخارجہ مخدوم شاہ محمود قریشی زور شاغا کہ پرامن و سوگو اوغانستان نئے بیرہ پاکستان کن اہمیت تخک بلکن ڈیہہ نا امن و ایمنی کن اوغانستان اٹی امن وایمنی المی ءِ۔ وزیرخارجہ جہانی برادری آ زور شاغا کہ او اوغانستان تون رابطہ غاتا کمک اٹ مثبت گام گیج آتے پک کے تانکہ اوغان الس نا گرج آتارداٹ انسانی بنداو تیا اوفتا کمک ءِ کننگ مرے و اوغانستان ءِ زرگزرانی بھسکاری آن رکھ کننگ مرے۔ اواوغانستان آن سفارتی کمامدار و جہانی ادارہ غاتا عملہ نا رکھ کشنگ نا بابت پاکستان نا کوشست آتے تالان کرے۔ اوپرتگال نا تینا ہم منصب ءِ بھارت نا انسانی حق انا بھلا خلاف ورزی، جنگی ڈوہ، انسانیت نا برخلاف ڈوہ، نسل کشی وبھارت نا غیر کانودی کوزہ گیری ٹی جموں و کشمیر اٹی اقوام متحدہ نا سلامتی کونسل قرارداد و جہانی انسانی حق انا کانود نا خلاف ورزی تا بابت جہانی برادری ءِ تروک آ شاہدی تیا تالان ڈوزیئرز نا بارواٹ ہم پارے۔ ہڑتوم آ وزیرخارجہ غاک پاکستان وپرتگال نا تین پہ تینی رابطہ غاتون اوار بڑزکو کہول انا ڈل آتا ہن و بر اٹ ودکی نا است خواہی نا ہم درشانی ءِ کریر۔
