اسلام آباد، نیویارک۔ 22ستمبر (اے پی پی) وزیرخارجہ مخدوم شاہ محمود قریشی پارینے کہ پاکستان و ناروے نا نیام اٹ، واپار، زرکاری و شونداری و شونہالی نا بشخ آتے ٹی کمکاری بے مٹ ءِ۔ داہیت ءِ او اقوام متحدہ نا جنرل اسمبلی نا 76می دیوان نا وخت آ ناروے نا تینا ہم منصب ایناایریکسن سوریڈاتون اوڑدہی ٹی پارے۔ ترجمان دفترخارجہ نا رداٹ اوڑدہی ٹی ہڑتوم آ کنڈآتا تعلقداری، علاقائی و جہانی اہمیت نا باندات آ گپ وتران کننگا۔ وزیرخارجہ پارے کہ پاکستان و ناروے نا تعلقداری تاریخی وڑانا ءُ۔ ناروے ٹی رہینگوک آ پنجاہزار پاکستانی تا، ہڑتوم آ کنڈآتا تعلقداری تے سوگو کننگ اٹ اہم ءُ کڑد اسے۔ اوپارے کہ ہڑتوم آ ملک آتا نیام اٹ سیاسی، اقتصادی، توانائی و تین پہ تینی است خواہی نا بشخ آتے ٹی ہڑتوم آ کنڈآتا کمکاری ءِ مون آ دننگ نا بھلو وارخواہی اس ارے۔ حکومت پاکستان، پیشن نا زرکار آتے پرکشش آسراتی تننگ ءِ۔ ناروے نا بھلا کمپنیک، ننا کاروبار دوست پالیسی تیان فائدہ ہرفسا، پاکستان اٹ زرکاری کرسا گچین ءُ منافع اس کٹنگ کیرہ۔ ہڑتوم آ وزیرخارجہ غاک پاکستان وناروے نا نیام اٹ بروک آ سیاسی سلابتی دیوان نا زوت اڈتننگ آ امنا کریر۔ وزیرخارجہ پارے کہ”ناروے نا پارلیمنٹ اٹ پاک۔ ناروے فرینڈ شپ پڑک نا جوڑ کننگ، ہڑتوم آ ملک آتا نیام اٹ پارلیمانی رابطہ غاتا مون آ دننگ فائدہ مند جوڑ مننگ کیک۔ وزیرخارجہ، نارویجین ہم منصب ءِ اوغانستان نا مون آ بروک آ حالیت و امن کن آخبت نا لائحہ عمل نا بابت پاکستان نا نقطہ نظرآن معلومدار کرے۔
