نیویارک۔ 22ستمبر (اے پی پی) وزیرخارجہ مخدوم شاہ محمود قریشی پارینے کہ وزیراعظم عمران خان نا پارت آ پیشن نا ملک پاکستانی سفارت خانہ و مشنز سمندر پار رہینگوک آ پاکستانی تا آسراتی کن خصوصی گام گیج کننگ اُن، کورونا دین انا حالیت آتے ٹی پیشن نا ملک رہینگوک پاکستانیک29.4ارب ڈالر نا تاریخی ترسیلات زر پاکستان آ مون تسر ہراڑآ مچ آ قوم اوفتا منت وار ءِ۔ داخیال آتا درشانی ءِ او نیویارک اٹی پاکستانی کمیونٹی آن تران کرساکرے۔ دود انا بست وبند ءِ قونصلیٹ جنرل نیویارک نا کنڈآن کننگاسس ہراٹی چیئرمین کشمیر کمیٹی شہریارخان آفریدی، اقوام متحدہ ٹی پاکستان نا آخبتی مندوب منیر اکرم و امریکہ ٹی پاکستان نا سفیر اسد مجید ئسک ہم دادود اٹی ساڑی ئسر۔ داوخت آ وزیرخارجہ مخدوم شاہ محمود قریشی پارے کہ کناقول ئس کہ ای ہراتم اقوام متحدہ جنرل اسمبلی نا دیوان اٹی بشخ ہلنگ کن بریوہ تو انشاء اللہ پاکستانی امریکن کمیونٹی تون ضرور اوڑدہی کیوہ۔ وزیراعظم عمران خان نا داپارت ہم ارے و است خواہی ہم کہ پیشن نا ملک رہینگوک آ پاکستانی تا خاص خیال ءِ تخنگے۔ اوپارے کہ او چیئرمین نادرا نا منت وار ءِ کہ او کمیونٹی نا آسراتی کن گام گیج کرے۔ پیشن نا ملک رہینگوک آ پکستانی تے مستین اٹ ریکارڈ نا دوئی کننگ اٹ مشکل مون تروئی تماکہ ولے داگام گیج آتا سوب آن ننا کمیونٹی ءِ مون تروک مشکل آتا ازالہ مریک۔ مخدوم شاہ محمود قریشی پارے کہ وزیراعظم عمران خان نا وژن نا رداٹ نن تینا مشن تے خاص پارت کرینن کہ پیشن نا ملک رہینگوک آ پاکستانی تا خاص خیال ءِ تخنگے۔ کورونا دین انا سوب آن بھاز انگا مخلوق نا کاروبار زہمی مس ولے ای پیشن نا ملک رہینگوک آ پاکستانی تا منت وار ءِ ہرفیوہ کہ نم 29.4ارب ڈالر نا تاریخی زر پاکستان آ مون تسرے ہرافتیان کم از کم 3ارب ڈالر امریکہ غان گدریفنگا۔
