اقوام متحدہ۔ 22ستمبر (اے پی پی) اوغانستان نا عبوری حکومت تینا ترجمان سہیل شاہین ءِ اقوام متحدہ ٹی سفیر پندار کننگ نا فیصلہ کرینے و اودے جنرل اسمبلی آن تران نا موکل نا خواست کرینے۔ فرانسیسی خبررساں ادارہ نا رداٹ اوغان کمامدارآک اقوام متحدہ نا جنرل اسمبلی نا دیوان نا وخت آ جہانی راہشون تیان تران کننگ کن دوحہ ٹی رہینگوک آ تینا ترجمان سہیل شاہین ءِ پندار کننگ نا فیصلہ کرینو۔ اقوام متحدہ نا اسہ ترجمان اس پارے کہ اوغان حکومت نا پوسکن آ وزیرخارجہ نیویارک اٹی داہفتہ اقوام متحدہ نا جنرل اسمبلی نا دیوان اٹی جہانی راہشون تیان تران کننگ نا پارینے، داکان بیدس معزول اوغان سفیر ہم ہیت کننگ نا خواست کرینے، ولے داسکان دافیصلہ متنے کہ جہانی ادارہ ٹی اوغانستان نا نمائندگی ءِ دیر کیک۔ اقوام متحدہ نا ترجمان سٹیفن ڈوجارک فرانسیسی خبررساں ادارہ ءِ پارے کہ 9باسکی کمیٹی داسہ ہڑتوم آ درخواست آتیافیصلہ کیک، ولے دا پیدوار اف کہ دوشنبے نادے کانووکیشن نا ایسر آن مست کمیٹی نا دیوان مریک یا آخا۔ اوپارے کہ اقوام متحدہ نا سیکرٹری جنرل انتونیوگوتریس ءِ طالبان نا امیر امیر خان متقی نا کنڈآن اسہ چٹھی اس دوئی مسنے ہراٹی بڑزکو کہولی شرہ ٹی بشخ ہلنگ نا خواست کننگانے۔ چٹھی ٹی داہم پاننگانے کہ غلام اسحاق زئی اقوام متحدہ ٹی اوغانستان نا نمائندگی ءِ کپننگ ءِ و حکومت دوحہ ٹی رہینگوک آ تینا ترجمان سہیل شاہین ءِ اقوام متحدہ ٹی ملک انا آخبتی مندوب پندار کرینے۔
