اقوام متحدہ۔ 22ستمبر (اے پی پی) ترک صدر رجب طیب اردگان اقوام متحدہ نا جنرل اسمبلی نا 76می دیوان اٹی تینا تران اٹی اقوام متحدہ نا قرارداد آتا رداٹ پاکستان و بھارت نا نیام اٹ بھلو وخت اسے آن ایسر نا چاری کشمیر نا ویل آ زور شاغانے۔ اوتدوک آ دے 193باسکی جنرل اسمبلی نا دیوان اٹی پارے کہ ننا داسہ ہم ہمو موقف ءِ کہ فریق آتا نیام اٹ گپ وتران و اقوام متحدہ نا تعلقدار قرارداد آتا رداٹ 74سال آن برجا جموں و کشمیر نا ویل انا ایسر اس کشنگے۔ اوپارے کہ کشمیر نا ویل انا ایسری کن ترکی کشمیری تتون تفوک ءِ۔ اوپارے کہ پنچ بھلا واک آتیان بیدس ہم دنیا بھاز بھلن ءِ۔ نن سمجھنہ کہ مون تروک چیلنج آتیان پد ہم دنیا ٹی انصاف نا مون آ دننگ ممکن ءِ۔ نن اواری اٹ ہندن ءُ دنیا اس جوڑ کننگ کینہ ہراڑے امن، سوگوی، شونہالی و خوشی مرے۔ جنرل اسمبلی نا سالانہ دیوان آتے ٹی پدریسہ کشمیر نا ویل ءِ تالان کروک آ ترک صدر اسمبلی نا 75می دیوان اٹی ہم پاریسس کہ کشمیر نا ویل اسہ تنازعہ سے ہرا سویلی ایشیا ٹی امن و سوگوی کن ہم مرکزی حیثیت تخک وجموں و کشمیر نا خصوصی حیثیت نا چٹفنگ نا گام گیج کشمیر نا جھیڑہ ءِ پین پیچیدہ کرینے۔ ہراڑآ بھارت دعویٰ کریسس کہ جموں و کشمیر بھارت نا تہہ نا معاملہ اسے۔
