کابل۔ 21ستمبر (اے پی پی) اوغانستان نا نائب وزیر حوالکاری ذبیح اللہ مجاہد پارینے کہ پاکستان اوغانستان نا تہہ نا باندات آتے ٹی نیام تمپننگ ءِ و اوغانستان اٹی سوگوی و امن کن وزیراعظم پاکستان عمران خان نا کوشست آک ستاکڑزرہ، دادے نیام تمنگ نا نظر اٹ ہُننگپ، اوغانستان اٹی داعش تنظیم نا دروشم اٹ ساڑی اف۔ سے شنبے نادے آ اوغانستان نا دارالحکومت کابل اٹ پریس کانفرنس اٹی اوپارے کہ ساڑی حکومت ءِ عبوری حکومت تکنگے، کابینہ نا جوڑ کننگ پورو متنے، داسہ داٹی پین مخلوق ءِ ہم اوار کینہ، نن اسہ اسیجائی و جامع حکومت اسے نا ٹہیفنگ نا کنڈآ ہِننگ اُن، زالبول آتے ہم زوت اہم عہدہ ملک، مسن تیکن بھاز زوت اسکول آتے ملنگک۔ اوپارے کہ عبوری کابینہ ٹی چندی مسلک آتیان تعلق تخوک آ بندغ آتے اوار کننگانے، ہرافتے ٹی ہزارہ و ایلو قوم تیان تعلق تخوک آ مخلوق، ٹیکنو کریٹس و خوانندہ بندغ آک اوار ءُ۔ اوپارے کہ جہانی برادری اوغانستان نا حکومت ءِ امنا کے، اوغان حکومت ءِ امنا کننگ آن بیدس بیرہ تنقید کننگ اسہ کنڈی نقطہ نظر ءِ۔ اواسہ سوج اسے نا ورندی ٹی پارے کہ اوغانستان اٹی سوگوی و امن کن وزیراعظم عمران خان کوشست آک ستاکڑزرہ ہرااہم ءُ پیش رفت ءُ دادے نیام تمنگ نانظر اٹ ہُننگپ۔ اوپارے کہ قطر، پاکستان و چین کون آ ملک آک اوغانستان اٹی سوگوی نا کوشست آتے ٹی لگوک ءُ، طالبانک خوارہ کہ اوغانستان اٹی پیشن نا مداخلت مف ولے کمکاری نا خیرمقدم ءِ کینہ۔ اواوغانستان اٹی حکومت نا بابت پاکستان نا وزیراعظم عمران خان نا بیان آ مثبت ردعمل نا درشانی ءِ کرسا پارے کہ پاکستان، قطر و ہراملک آک اوغانستان اٹی امن نا خواہندار ءُ او اوغانستان اٹی برجا سیاسی پیش رفت نا تائید ءِ کیرہ و نن قطر و ایلو ملک آتون رابطہ ٹی اُن، ہراملک آک اوغانستان اٹی سوگوی ٹی کمک کننگ خوارہ اوفتا خیرمقدم ءِ کینہ۔ اوپارے کہ اوغانستان اٹی زوت اقتصادی سرجزآک بحال مریرہ، مشکل ارے ولے زوت اوفتا مون ءِ توننگک۔ اوپارے کہ اوغانستان اٹی داعش تنظیم نا دروشم اٹ ساڑی اف ولے دہشت گردی و بدامنی نا ہراواقعہ غاک مننگ ءُ اوفتے منتشر دہشت گرد آک کننگ ءُ اوفتا توننگ کن کوشست کننگ انگ ءِ و اوفتا زوت مون ءِ توننگک۔ اوپارے کہ اوغان الس اٹ داعش نا برخلاف نفرت ءِ۔
