نیویارک۔ 21ستمبر (اے پی پی) وزیرخارجہ مخدوم شاہ محمود قریشی پارینے کہ اوغانستان اٹی مفاہمت نا عمل شمولیتی حکومت نا جوڑ کننگ آن بیدس پورو مننگ کپک، جہانی سلاہ نا شرف و تینا قول آتا پاسداری طالبان تا گچین فائدہ ٹی ءِ۔ داہیت ءِ او نیویارک اٹی یو این پریس نمائندہ غاتا ڈل اتون پاکستان ہاؤس اٹی اوڑدہی ٹی پارے۔ وزیرخارجہ اہم علاقائی و جہانی باندات آ پاکستان نا نقطہ نظر نا وضاحت ءِ کرے و اوغانستان نا مون آ بروک آ حالیت آتیا گپ وتران کرے و صحافی تا سوج آتا ورندی ءِ تس۔ وزیرخارجہ پارے کہ اوغانک تدوک آ چاردہائی ٹی جنگ و جدل تون مون تسنو، داسہ اوغانستان اٹی امن نا اومیت ودی مسنے۔ جہانی برادری دانازرک موڑ آ اوغان تے تنیا بایدے ہلپ۔ اوپارے کہ پرامن اوغانستان مچ آ ڈیہہ کن فائدہ نا سوب مریک۔ وزیرخارجہ پارے کہ اوغانستان اٹی ودی مروک آ انسانی تنکی نا خطرہ تون مون تننگ کن جہانی برادری ءِ مون آ برسا اوغان تا کمک ءِ پک کننگ کن گام گیج کروئی مریک۔ نن اوغانستان اٹی امن و سوگوی خوانہ۔ شاہ محمود قریشی پارے کہ کنا سلاہ ٹی اوغانستان نا منجمد میرات آتے اوغان تیکن ملنگ جوان مریک داپت سازی کن اہم ءُ گام اس مننگ کیک۔ اسہ سوج اسے نا ورندی ءِ ترسا وزیرخارجہ پارے کہ نن امن نا خواہندار اُن اینو ہم ہندوستان تون آپشن ارے اگہ او ڈیہہ ٹی امن نا خواہندار ءِ تو کشمیری تیا برجاظلم ءِ بند کے و 5اگست کون آ غیر آئینی گام گیج آتے پدی ہلے، پاکستان، ڈیہہ ٹی امن نا کوشست آتے ٹی شریداری نا خواہندار ءِ۔ وزیرخارجہ تون اوڑدہی کروک آتے ٹی، ایسوسی ایٹڈ پریس، اے ایف پی، العربیہ الجدید، نیوزویک، وائس آف امریکہ، بلوم برگ، روسی نیوز ایجنسی ٹاس، نکی، انادولونیوز ایجنسی، ایسوسی ایٹڈ پریس آف پاکستان نا نمائندہ غاک اوار ئسر۔
