واشنگٹن۔ 16ستمبر (اے پی پی) امریکی وزارت خارجہ نا ترجمان نیڈپرائس پارینے کہ نن پاکستانی کمامدار و پاکستانی سرکڑدہ غاتون پدریسہ رابطہ ٹی اُن، پاکستان اوغانستان اٹی ہندن ءُ حکومت اسے نا جوڑ کننگ نا چرجوئی اٹ مخ تفی ءِ کرینے ہراٹی غٹ فریق آک اوار مریر و ہرادے بھلو کچ اسے آ السی مخ تفی دوئی مرے، انسانی حق و انسداد دہشت گردی و مستین نا بھرم تا رکھ انا بابت گڑتی تیا اسیجائی اولیت داہیت انا پیداوری ءُ نن غٹ اسہ ہی کنڈآ کان۔ میڈیا حوال اٹی اسہ سوج اسے نا ورندی ٹی امریکی ترجمان پارے کہ پاک امریکہ تعلقداری نا پژدر اٹ نن پاکستانی کمامدار و پاکستانی سرکڑدہ غاتون پدریسہ رابطہ ٹی اُن۔ نن اوغانستان نا حالیت آتیا سرجمی اٹ گپ وتران کرینن۔ ترجمان تدوک آ ہفتہ جرمنی ٹی مروک آ وزارتی کہول انا ورچوئل دیوان نا حوالہ ءِ تس ہراٹی امریکی وزیر خارجہ انٹونی بلنکن و جرمن وزیر خارجہ ہائیکو ماس و پاکستان نا وزیرخارجہ شاہ محمود قریشی ئسک بشخ ہلکوسر۔ اوپارے کہ داوخت آ داہیت آ امنا مس کہ اوغانستان اٹی تدوک آ 20سال اٹی دوئی مروک آ بھرم، خاص وڑاٹ زالبول، مسن و اقلیت آتا بابت سرسہبی تا رکھ غٹ انا فائدہ ٹی ءِ۔ داڑتون اوار اوار اوغان الس نا مصائب اٹی کمتی ہم غٹ انا فائدہ ٹی ءِ۔ داپاکستان تون اوار اوار ہموملک آتا ہم فائدہ ٹی ءِ ہرااوغانستان آن نسبتاََ زیات فاصلہ غا واقع ءُ۔ ترجمان پارے کہ پاکستان اوغانستان اٹی ہندن ءُ حکومت اسے نا جوڑ کننگ نا چرجوئی اتون مخ تفی ءِ کرینے ہراٹی غٹ فریق آک اوار مریر و ہرادے بھلو کچ اسے آ السی مخ تفی دوئی مرے۔ ترجمان داوخت آ امریکی وزیرخارجہ نا تدوک آ دے انا بیان نا وضاحت کرسا پارے کہ نن خواہندار اُن کہ پاکستان و ڈیہہ نا ایلو ملک آک تینا قول آتا رداٹ اوغان الس نا کمک کن چندی گام گیج آتے ٹی ترندی اتیرہ و دا چرجوئی ٹی نئے بیرہ ننا بلکن جہانی برادری اتون اواری اٹ تعمیری وڑاٹ اسیجائی اولیت آتا رداٹ کاریم کیرہ ہرافتے ٹی انسانی حق انا بابت گڑتی، تدوک آ بیست سال اٹی دوئی مروک آ بھرم تا رکھ و انسداد دہشت گردی نا بابت گڑتیک اوار ءُ تانکہ داہیت ءِ پک کننگے کہ نن غٹ اسہ ہی کنڈآ ہِننگ اُن۔
