جنیوا۔ 15ستمبر (اے پی پی) پاکستان کشمیری الس ءِ اوفتا حق خودارادیت آن محروم کننگ نا بھارتی غیرکانودی گام گیج آتا مذمت ءِ کرسا خبڑدار کرینے کہ بھارتی ریاستی مشینری مقبوضہ جموں وکشمیر اٹی ظلم و جور انا اسہ حقی ءُ ازباب اس جوڑ مسنے۔ کشمیر میڈیا سروس نا رداٹ جنیوا ٹی اقوام متحدہ نا دفتراٹ پاکستانی سفیر خلیل ہاشمی اقوام متحدہ نا انسانی حق کونسل نا برجا48می دیوان اٹی اسہ لس ءُ شرہ سے ٹی پارے کہ بھارتی ریاستی مشینری عدلیہ غان ہلیس بیوروکریسی اسکان جور انا اسہ حقی ءُ ازباب اس جوڑ مسنے۔ اواقوام متحدہ نا ہائی کمشنر انسانی حق مچل بیچلیٹ نامنت واری ءِ ہرفے کہ او 47باسکی کونسل ءِ مقبوضہ جموں و کشمیر اٹی بھارت نا کنڈآن برجا انسانی حق انا سنگین خلاف ورزی تا بارواٹ پارے۔ پاکستانی سفیر پارے کہ داتُواٹی ہم ہراتم کونسل بھارت تون تینا باسک انا حیثیت اٹ اوڑدہی کننگ ءِ۔ ہندو قوم پرست حکومت کشمیری راہشون سید علی نا دزگیری ٹی کزیت آن پد متنازعہ علاقہ ٹی کرفیو و مواصلاتی بندش نافذ کرے۔ خلیل ہاشمی پارے کہ سید گیلانی نا میت اتون ہتک آمیز سلوک و ایماندار نا است خواہی نا برخلاف اونا جہہ جاگہ بھارت نااخلاقی خواتہ مننگ نا نشانی ءِ۔ پاکستانی سفیر پیدواری کرے کہ بھارت فسطائی ذہنیت نا سوب آن متنازعہ علاقہ ٹی شکبر کانود و انتظامی گام گیج آتا آڑاٹ آبادی نا بیٹ کچ اٹ بدلی نا تینا ریاستی پالیسی ءِ مون آ دننگ ءِ۔ اوپارے کہ 42لکھ غیر کشمیری تے ڈومیسائل سرٹیفکیٹ تننگ آن بیدس اوفتے مقبوضہ علاقہ ٹی جائیداد ہلنگ و ہموڑے نوکری دوئی کننگ ناموکل ہم تننگانے۔ اوپارے کہ بھارت کشمیری تا ڈغار، جائیداد و قدرتی وسیلہ غاتیا کوزہ کننگ ءِ و اوفتے تینا یکتا دودوربیدگی و مذہبی شناخت آن محروم کننگ ءِ۔ اوپارے کہ داغیر کانودی گام گیج کشمیری تے اوفتا حق خودارادیت آن محروم کننگ کن کننگ انگ ءِ ہرا اقوام متحدہ نا سلامتی کونسل نا قرارداد و چارمیکو جنیوا کنونشن نا خلاف ورزی ءِ۔ پاکستانی سفیر پارے کہ نہہ لکھ آن زیات بھارتی فورس کارندہ غاک مقبوضہ علاقہ ءِ گھیڑ کرینو، بھارت آزاد مبصرآتے مقبوضہ علاقہ اسکان رسینگ آن پدریسہ انکار کننگ ءِ وخت اس کہ کوزہ گیر بھارتی فورس کارندہ علاقہ ٹی انسانی حق انا سنگین خلاف ورزی تیٹی لگوک ءُ۔
