واشنگٹن۔ 14ستمبر (اے پی پی) امریکی صدر جوبائیڈن21ستمبر آ اقوام متحدہ نا جنرل اسمبلی آن تران کیک۔ فرانسیسی خبررساں ادارہ نا رداٹ وائٹ ہاؤس نا ترجمان جین ساکی تدوک آ دے اسہ بیان اسے ٹی پارے کہ امریکی صدر اقوام متحدہ نا جنرل اسمبلی آن تران اکن 21ستمبر آ نیویارک آ روانہ مریک۔ ترجمان پارینے کہ جنرل اسمبلی نا دیوان اٹی امریکہ و چندی ملک آتا نیام اٹ تعلقداری، چندی بشخ دُن کہ کورونا دین، چاگڑدی تنکی تون مون تننگ نا گام گیج، پوسکن آ ٹیکنالوجی و سائبر سپیس اٹ شریداری و انڈوپیسیفک ریجن اٹ آجو سرجزآتا مون آ دننگ کن عملی کمکاری ءِ سوگو کننگ آ چکار کننگک۔ اقوام متحدہ نا جنرل اسمبلی نا دیوان تدوک آ سال کورونا نا دین انا سوب آن ورچوئل اڈہلکوسس ولے اینخو نا سال دا دیوان ہائبرڈ۔ان پرسن۔ورچوئل فارمیٹ اتون اڈہلنگ ءِ یعنی دا دیوان اٹی چندی ملک آتا نمائندہ غاک تینٹ بشخ ہلیرہ وخت اس کہ گڑاس ورچوئل بشخ ہلیرہ۔ داکان مست وائٹ ہاؤس پارے کہ آسٹریلیا، جاپان و بھارت نا وزیراعظم آک 24ستمبر آ امریکہ نا دورہ ءِ کیرہ و امریکی صدر جوبائیڈن تون وائٹ ہاؤس اٹ اوڑدہی کیرہ۔
