اقوام متحدہ۔ 10ستمبر (اے پی پی) اقوام متحدہ نا سیکرٹری جنرل انتونیوگوتریش دنیا غا زور شاغانے کہ او طالبان آتون گپ وتران ءِ برجاتخر۔ اوتدوک آ دے فرانسیسی خبررساں ادارہ ءِ انٹرویو ٹی پارے کہ ننے طالبان آتون گپ وتران نا چرجوئی ءِ برقرار تخوئی مریک ہرااوغان الس تون یکجہتی نا احساس اسے۔ اوپارے کہ ننا فرض ءِ کہ نن مشکل آتا گواچی اوغانستان نا الس تون یکجہتی ءِ برجاتخن، ہراڑے لکھ آ بندغ بین آن کہینگ کیرہ و دنیا اوغانستان اٹی زرگزرانی تنکی نا مون ءِ توننگ کن کمک کے۔ اومچ آ دنیا ٹی اوغانستان نا منجمد میرات آتے جاری کننگ یا جہانی پابندی تا چٹفنگ نا بابت ہچ ءُ خواست اس کتوولے او داہیت آ زور شاغا کہ مالی میرات آتیان اوغانستان نا زرگزران ءِ سیبوملک۔ اوپارے کہ طالبان آتون گپ وتران نا انت نتیجہ اس دوئی مریک دانا ہچ ءُ ضمانت اس اف ولے نن ہنداخس خوانہ کہ اوغانستان دہشت گردی نا مرکز جوڑ مف، زالبول و مسن تے اوفتا غٹ حق دوئی مرے، جتا نسلی گروہ تے نمائندگی دوئی مرے۔ اوپارے کہ اقوام متحدہ اوغانستان اٹی جامع حکومت اسے نا ٹہیفنگ نا خواہندار ءِ۔ اوپارے کہ اوغانستان اٹی امن و سوگوی تون اوار اوار مخلوق نا حق انا شرف ءِ کننگے۔ اوپارے کہ طالبانک خوارہ کہ اوفتے دنیا ٹی امنا کننگے، اوفتا مالی کمک ءِ کننگے و پابندی تے چٹفنگے ہراجہانی برادری کن فائدہ مند ءِ۔
